राजपा केन्द्रीय कोषाध्यक्ष एमालेमा प्रवेश
प्रकाशित मिति : असार ४, २०७४ आईतबार
असार ४, २०७४- राष्ट्रिय जनता पार्टी, नेपालका केन्द्रीय कोषाध्यक्ष अनिता यादव एमाले प्रवेश गरेकी छन् । उनीसहित राजपा केन्द्रीय सदस्य राजेश्वर महासेठ पनि एमाले प्रवेश गरे ।
पार्टी कार्यालय धुम्बाराहीमा आइतबार बिहान भएको कार्यक्रममा एमाले अध्यक्ष केपी ओलीले यादव, महासेठलगायतका नेताहरुलाई पार्टी प्रवेश गराए ।
यादवले पार्टीमा अतिवादी प्रवृत्ति सुरु भएको भन्दै शनिबार नै पार्टीसमक्ष राजीनामा दिएकी थिइन् । ‘पछिल्लो कालखण्डमा मधेसी जनताले वास्तविकरुपमा खोजेको समन्याय, समानता र समृद्धिको एजेन्डाबाट पार्टी विचतिल भएको,’ राजीनामा पत्रमा उनले लेखेकी छन्, ‘र, राजनीतिको नाममा पूर्णरुपले अतिवाद पल्पलाएकोप्रति मेरो घोर आपत्ति र असन्तुष्टि छ ।’
यादवले २४ वर्षे राजनीतिक यात्रामा १० वर्ष मधेसकेन्द्रित दलमा बिताएको उल्लेख गर्दै आफू आफ्नै घरमा फर्किएको बताइन् । उनले आफूविरुद्धका भ्रम चिर्न नसक्दा एमालेले तराई मधेसमा भावनात्मक क्षति व्यहोरोको भन्दै चिन्ता व्यक्त गरिन् ।
कार्यक्रममा एमाले अध्यक्ष केपी शर्मा ओलीले कुनै एमालेविरुद्ध भ्रम फैलाउने प्रवृत्ति विस्तारै निरुत्साहित हुँदै गएको बताए । उनले मधेसकेन्द्रित दलबाट पार्टी प्रवेश गर्ने क्रम यतिमै सीमित नहुने दाबी गरे । कुनै पनि पद, लोभ र स्वार्थबिना एमालेमा प्रवेश गर्नु नै आफूहरुको ठूलो सम्पत्ति भएको ओलीले उल्लेख गरे ।
यादव तत्कालिन तमलोपा कोषाध्यक्ष श्रीकृष्ण यादवकी श्रीमती हुन् । यादवको दुर्घटनामा निधन भएपछि अनिताले दोस्रो संविधानसभा निर्वाचनमा धनुषा– ५ बाट चुनाव लडेकी थिइन् । धनुषा– ५ मा कांग्रेसका चन्द्रमोहन यादवले ११ हजार ७ सय ५ मत ल्याई निर्वाचित हुँदा एमालेका रघुवीर महासेठले १० हजार २३ मत पाएका थिए भने अनिताले तमलोपाबाट ८ हजार ३ सय ६५ मत पाएकी थिइन् ।
अनिताका पति श्रीकृष्ण यादव लामो समय एमालेकै राजनीतिमा थिए । २०६३ सालमा महन्थ ठाकुरको नेतृत्वमा तमलोपा स्थापना भएपछि उनले एमाले परित्याग गरेका थिए ।
तराई मधेसप्रति अनुदार आरोप लागेको एमालेले पछिल्लो पटक मधेसकेन्द्रित दलका उच्च तहका नेता नै भित्र्याएको छ । उसले यसअघि राजपाकै केन्द्रीय सहमहामन्त्री समिम मियाँ अन्सारीलाई पार्टीमा भित्र्याएको थियो भने वीरगन्जमा माओवादी नेता बसरुद्दिन अन्सारी एमालेमा प्रवेश गरेका थिए ।
Source : Ekantipur