Follow @khasokhasmag

वाइड बडीका लागि निगमले ८ अर्ब जर्मनी पठायो


प्रकाशित मिति : असार ३, २०७४ शनिबार

असार ३, २०७४

नेपाल एयरलाइन्सले दुई ठूला जहाज किन्नका लागि शुक्रबार जर्मनीमा रहेको एजेन्ट नर्टन रोज फुलब्राइटलाई पहिलो किस्ताबापत ७९ मिलियर डलर (८ अर्ब १३ करोड ७० लाख रुपैयाँ) पठाएको छ ।
निगमका प्रवक्ता रवीन्द्र श्रेष्ठका अनुसार यो रकम काठमाडौंस्थित नेपाल इन्भेस्टमेन्ट बैंकमार्फत उक्त एजेन्टको खातामा पठाइएको हो । नर्टन रोजको नाममा मध्यस्थ खाता (स्क्रु एकाउन्ट) खोलिएको छ । निगमलाई जहाज उपलब्ध गराउने हाइफ्लाईले आफ्ना दुई सहएजेन्टसमेतको प्रतिनिधित्व हुने गरी जर्मनीमा खोलेको यो खातामा रकम पुगेपछि निगम र हाइफ्लाईको सहमतिमा जहाज निर्माता कम्पनी एयरबसको खातामा रकम जानेछ । ध्वजावाहक निगमले गत फागुन ४ मा कमिटमेन्ट रकमअन्तर्गत एक मिलियन (१० करोड ३३ लाख रुपैयाँ) डलर बैना पठाइसकेको छ । ‘पहिलो किस्ता ८० मिलियन पठाउने सहमतिअनुसार रकम पठायौं, आगामी बिहीबारसम्म त्यो रकम एयरबसको खातामा पठाउनेछौं,’ निगमका एक अधिकारीले भने । निगमले बाँकी १६ अर्ब रुपैयाँँ जहाज ल्याइनुअघिको अन्तिम एक महिना अगाडि भुक्तानी गर्नेछ ।
निगमलाई जहाज दिलाउने एएआरले जहाजको स्लट नम्बर दिइसकेको छ । प्रि–डेलिभरी रकम पठाएपछि एयरबसको वेबपेजमा अर्डर गरिएका जहाजको विवरण देखिने निगमले दाबी गरेको छ ।
गत चैत २५ मा २१ अर्ब ९० करोड रुपैयाँमा दुइटा जहाज खरिद गर्न निगमले हाइफ्लाई, जर्मन एभिएसन क्यापिटल र अमेरिकी कम्पनी एएआर कर्पोरेसनसँग खरिदबिक्री सम्झौता गरेको थियो । निगमले यसै साता वार्षिक ९ प्रतिशत ब्याजदरका आधारमा नागरिक लगानी कोषसँग र कर्मचारी सञ्चय कोषसँग १२/१२ अर्ब गरी २४ खर्ब ऋण सम्झौता गरेको छ । यो रकम जुटेसँगै नेपाल एयरलाइन्सलाई एयरबसको वाइड बडी ए ३३०–२०० सिरिजका दुइटा जहाज किन्न बाटो खुलेको थियो ।

Source : Ekantipur

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com