Follow @khasokhasmag

बुस्टर डोजबारे एफडीएको निर्णय सीडीसीबाट आंशिक स्वीकृत, ६५ बर्षमाथिकालाई दिइने


प्रकाशित मिति : आश्विन ८, २०७८ शुक्रबार

बिहिबारको अमेरिकन सीडीसीका लागि भ्याक्सिन सल्लाहकारहरुको लामो र कडा तर्क र बहसपछि शुक्रबार विहानै सीडीसीले ६५ बर्षभन्दा माथिकालाई र उच्च जोखिममा रहेकाहरुलाई कोरोनाबिरुद्धको भ्याक्सिनको तेश्रो बुस्टर डोज दिने एफडीएको निर्णयलाई नै सदर गरेको छ । ६५ बर्षभन्दा माथिका, दीर्घकालिन हेरचाह केन्द्रमा रहनेहरु र स्वास्थ्य समस्या भएका निश्चित व्यक्तिहरुका लागि बुस्टर डोज स्वीकृत गरेपनि सीडीसीका सल्लाहकारहरु जोखिमयुक्त स्थानमा काम गर्नेहरुलाई पनि बुस्टर डोज दिने एफडीएको निर्णयबिरुद्ध मतदान गरेका छन् ।

एफडीएले ६५ बर्षभन्दा माथिका व्यक्तिका अतिरिक्त १८देखि ६४ बर्षकाहरुका सन्दर्भमा कोभिड १९ बाट सिकिस्त हुने उच्च जोखिममा रहेकाहरु मात्र नभई उच्च जोखिमयुक्त स्थानमा काम गर्ने स्वास्थ्यकर्मी लगायतका लागि बुस्टर डोज स्वीकृत गरेको थियो । तर सीडीसीले उच्च जोखिमयुक्त स्थानमा काम गर्नेलाई समेत बुस्टर डोज दिने एफडीए निर्णयको एउटा अंशलाई अस्वीकृत गरेको छ ।

सीडीसीका सल्लाहकारहरुले कोरोनाबिरुद्धको फाइजर भ्याक्सिनको बुस्टर डोज ६५ बर्ष वा त्योभन्दा माथिका र दीर्घकालिन हेरचाह केन्द्रहरुमा बस्नेहरुलाई भ्याक्सिनको पूर्ण डोज लगाएको ६ महिना नाघेपछि बुस्टर डोज दिनसकिने विषय एकमतले पारित गरेका छन् । त्यस्तै ५० बर्ष वा त्योभन्दा माथिका उच्च जोखिममा रहेका क्यान्सर, स्ट्रोक, मृगौला रोग, मधुमेह, मुटुरोग लगायतबाट पीडितहरुका लागि पनि बुस्टर डोज सहजै स्वीकृत गरिएको छ । तर ५० बर्षभन्दा कम उमेरका उक्त समुहमा पर्नेलाई बुस्टर डोज आवश्यक भए नभएकोबारे मत विभाजन भएको थियो । तर १८ देखि ४९ बर्षसम्मका उक्त समुहका व्यक्तिका लागि पनि पक्षमा ९ र विपक्षमा ६ मतले बुस्टर डोज स्वीकृत गरिएको छ ।

१८ बर्षभन्दा माथिका प्राय सबैलाई बुस्टर डोज दिने ह्वाइटहाउसको योजना रहेपनि एफडीए र सीडीसीका सल्लाहकारहरुमा आएको मत विभाजनका कारण सबैलाई बुस्टर डोज नदिइने भएको छ । बाइडेन प्रशासनले यसैसातादेखि अमेरिकाका बुस्टर डोज सुरु गर्ने योजना बनाएको थियो । तर त्यसमा एफडीएले निर्णय लिनमा ढिलाई गरेका कारण उक्त योजना पनि पछि सरेको थियो । सीडीसीले बुस्टर डोजबारे निर्णय लिइसकेकाले अब स्वीकृत समुहका लागि अमेरिकी सरकारले बुस्टर डोज दिन सुरु गर्ने अपेक्षा गरिएको छ ।

अमेरिकामा अहिलेसम्म २२ करोड डोजभन्दा बढी फाइजर भ्याक्सिन लगाइसकिएको छ । यो भ्याक्सिन पूर्णरुपमा लगाउनेहरु अमेरिकामा सबैभन्दा धेरै झण्डै १० करोड रहेका छन् । मोडेर्ना भ्याक्सिन पूर्णरुपमा लगाउनेहरु अमेरिकामा सबैभन्दा झण्डै पौने ७ करोड रहेका छन् । जोन्सन एण्ड जोन्सन भ्याक्सिन लगाउनेहरु झण्डै डेढ करोड छन् ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com