न्युयोर्कको म्यानहटन अपार्टमेन्टमा आगो लगाएपछि छतबाट हामफाले १८ बर्षका टीएनएजर
प्रकाशित मिति : आश्विन ३, २०७८ आईतबार
न्युयोर्कको म्यानहटनमा रहेको आफू बस्दै आएको अपार्टमेन्टमा आगो लगाएपछि १८ बर्षका टीएनएजर जामेल मार्टिनेजले छतबाट हामफालेका छन् । शनिबार साँझ छतबाट हामफालेका उनको घटनास्थलमा नै मृत्यु भएको छ ।
मानसिक रोगबाट पीडित उनले न्युयोर्क सिटी हाउजिङ अथोरिटीको इस्ट १०५ स्ट्रीटमा रहेको इस्ट रिभर हाउस अपार्टमेन्टको १० औं तलामा रहेको अपार्टमेन्टमा आगो लगाएका थिए । साँझ पौने ५ बजेतिर आगो लगाउने बित्तिकै उनी छतबाट हामफालेको जनाइएको छ । न्युयोर्क फायर डिपार्टमेन्टका अग्नीरक्षकहरुले आगो नियन्त्रणमा लिएका थिए ।
डिप्रेशनको शिकार भएका ती टीनएजर झण्डै १ महिना अगाडि बेलभ्यु अस्पतालबाट डिस्चार्ज भएका थिए । आफूले अस्पताललाई डिस्चार्ज नगर्न अनुरोध गरेपनि अस्पतालले डिस्चार्ज गरेको र घरमा आइसकेपछि पनि उनी मानसिक समस्यासँग जुधिरहेको उनका बाबु जेम्स ह्वाइटले बताएका छन् ।
हाइस्कुलबाट ग्रयाजुएट हुनेमा पढाइको दवावका कारण ती टीनएजर डिप्रेसनमा गएको जनाइएको छ । बेलभ्यु अस्पताललाई आफूले डिस्चार्ज नगरेर दिमाग ठीक ठाउँमा ल्याउनका लागि कार्यक्रमको अनुरोध गरेपनि नमानेको बाबु जेम्सले बताए । उनले भने अस्पतालले उसलाई डिस्चार्ज गर्नै नहुने थियो ।
ती टीनएजर पहिलेपनि घरबाट भागेको र हराएको बच्चाका रुपमा समाचारमा आएको जनाइएको छ । उनलाई सहायताको आवश्यकता भएको र मान्छेहरुले मानसिक चीजलाई गम्भिरतापूर्वक नलिएको मृतकका बाबुको गुनासो छ ।
ती टीनएजर छतबाट हामफालेर एउटा गाडीमाथि ठोक्किएको एकजना १२ बर्षका बालकले देखेका थिए । गाडीमाथि ठोक्किएको आवाज आएको र घटना देखेर आफू दुखी भएको ती बालकले बताएका छन् ।