सिनेटको बहुमत निर्धारण गर्ने जर्जियाको चुनावमा २० लाख बढीले गरिसके अग्रिम मतदान
प्रकाशित मिति : पुस १०, २०७७ शुक्रबार
सिनेटको बहुमत निर्धारण गर्ने जर्जियाको चुनावमा २० लाख बढीले अग्रिम मतदान गरिसकेका छन् । गत राष्ट्रपति चुनावमा झण्डै ५० लाखले मतदान गरेको जर्जियामा अहिले जनवरीमा ५ मा चुनावको मुख्य दिन आउनु अगाडि २० लाख बढीले अग्रिम मतदान गरेका छन् ।
अग्रिम मतदान गर्नेहरुमा ७ लाख २१ हजार हुलाकमार्फत मतपत्र पठाएर गर्नेहरु रहेका छन् भने १३ लाख ४१ हजारले मतदान स्थलमा उपस्थीत भएर मतदान गरेका छन् । सिनेटको विशेष चुनावमा मतदान गरेका ३ प्रतिशतले राष्ट्रपति चुनावमा भने मतदान गरेका थिएनन् ।
जर्जियामा राष्ट्रपति चुनावमा मतदान नगरेका एकलाख बढीले सिनेटरको चुनावका लागि हुलाकबाट मतपत्र मगाएका थिए । जर्जियाबाट प्रतिनिधित्व गर्ने २ जना सिनेटरका लागि जनवरी ५ हुने चुनावमा नोभेम्बर ३ को तुलनामा अझ बढीले भाग लिने अनुमान गरिएको छ ।
राष्ट्रपति चुनावको नतिजा झण्डै १२ हजारमतले निर्धारण भएको जर्जियामा नोभेम्बर ३ को चुनावमा मतदान नै नगरेका ६४ हजार भन्दा धेरैले अग्रिम मतदानमा मतदान गरेका छन् भने बाँकीले आगामी दिनमा गर्ने देखिएको छ ।
हुलाकबाट मतपत्र मगाउनेहरु मध्ये ६० प्रतिशत श्वेत बाहेकका अमेरिकनहरु रहेका छन् । राष्ट्रपति चुनावमा मतदान नगरेका र अहिले मतपत्र मगाएकाहरुमा २८ प्रतिशत मतदाताहरु ३९ बर्षभन्दा कम उमेरका रहेका छन् ।
जनवरीमा ५ मा हुने चुनावमा रिपब्लिकन उम्मेदवारहरु डेभिड पर्डयु र केली लोफ्लर रहेका छन् । त्यस्तै डेमोक्रेटिक उम्मेदवारहरुमा जोन ओसफ र राफल वार्नक रहेका छन् ।
अमेरिकाको प्रतिनिधिसभामा डेमोक्रेटिक पार्टीले बहुमत कायम गरेको अवस्थामा सिनेटमा भने कस्को बहुमत कायम हुने भन्ने कुराको निर्धारण जनवरी ५ को जर्जियाको चुनावले गर्नेछ । सिनेटमा अहिले ४८ सिट डेमोक्रेटिक पार्टीले र ५० सिट रिपब्लिकन पार्टीले जीतेका छन् । जर्जिया दुबै सिट डेमोक्रेटिक पार्टीका उम्मेदबारले जीतेमा उपराष्ट्रपतिले गर्ने टाइब्रेक मतका आधारमा सिनेटमा डेमोक्रेटिक पार्टीको नियन्त्रण हुनेछ ।
तर जर्जियाको दुईवटै वा दुईवटामध्ये एउटा सिटमा मात्र रिपब्लिकनले जीतेमा सिनेटमा रिपब्लिकनको बहुमत कायम हुनेछ । त्यसैले जर्जियाको चुनावले सिंगै अमेरिकाको आगामी परिदृश्यलाई परिवर्तन गर्नसक्ने देखिएको छ ।
जनवरी ५ को जर्जियाको चुनावले निर्धारण गर्नसक्छ ११ मिलियन कागजपत्रविहिनको भविश्य
जर्जियामा राष्ट्रपति चुनावमा जो बाइडेनले जीतेका छन् । १६ इलेक्टोरल मत रहेको जर्जियामा राष्ट्रपति चुनावमा सन् १९९६ देखि रिपब्लिकनले जित्दै आएकोमा यसपटक डेमोक्रेटिक उम्मेदबार बाइडेनले जीतेका हुन् । कुनैबेलाको रेडस्टेट जर्जिया अब ब्याटलग्राउण्ड राज्य भएको छ ।
सन् २००२ यता जर्जियामा रिपब्लिकन गभर्नरले जित्दै आएका छन् । त्यस्तै जर्जियाबाट सन् २००४ यता सिनेटमा दुबै सदस्य रिपब्लिकनहरु रहदै आएका छन् । तर हाउसमा भने मिश्रित प्रतिनिधित्व रहँदै आएको छ ।