राहतबारेको ह्वाइटहाउससँगको वार्ता सकारात्मक, डेमोक्र्याट्सको नयाँ बिलमा रिपब्लिकन असहमत
प्रकाशित मिति : आश्विन १४, २०७७ बुधबार
अमेरिकी संसदको तल्लो सदन प्रतिनिधिसभाका डेमोक्रेटिक सांसदहरुले सार्वजनिक गरेको २ दशमलव २ ट्रिलियन डलरको नयाँ बिलमा सिनेटमा रिपब्लिकन नेता मिच म्याक्कोनेलले असहमति जनाएका छन् । अमेरिकामा दोश्रो चरणको १२ सय डलरको राहत चेक र काम गुमाएकाहरुलाई अतिरिक्त साप्ताहिक ६ सय डलर समेटिएको उक्त बिल माटो असुहाउँदो र निकै ठूलो रहेको म्याक्कोनेलले टिप्पणी गरेका छन् ।
उनले यो बिल सम्झौताबाट निकै टाढा रहेको बताएका छन् । उनले यो बिल रिपब्लिकनहरुलाई वार्ताको टेबलमा ल्याउनका लागि गम्भीर प्रयास नभएको बताएका छन् ।
बुधबार हाउस स्पीकर न्यान्सी पेलोसी र ट्रेजरी सेक्रेटरी स्टेभन मन्चिनबीच राहत प्याकेजबारे ९० मिनेट कुराकानी समेत भएको छ । पेलोसीले वार्ता जारी रहने बताएकी छिन् । मन्चिनले पनि केही दिनयता उल्लेख्य प्रगति भएको भन्दै आशा व्यक्त गरेका छन् । अहिलेसम्म सहमति कायम नभएको तर कहाँ पुगेर समाप्त हुन्छ आफूहरुले हेर्न मन्चिनले बताएका छन् ।
आजै मन्चिनले १ दशमलव ५ ट्रिलियन डलरको राहत योजनाको अफर समेत गरेका थिए । ह्वाइट हाउस र रिपब्लिकनहरुबीच १ दशमलव ५ ट्रिलियन डलरको राहत प्याकेजमा सहमति भएमा सिनेटका रिपब्लिकनहरुले १ दशमलव ५ ट्रिलियनको राहत प्याकेजलाई समर्थन गर्ने नगर्नेबारे केही स्पष्ट छैन ।
यसअगाडि डेमोक्रेटिक सांसदहरुले हाउसबाट ३ दशमलव ४ ट्रिलियन डलरको बिल पारित गरेका थिए । तर रिपब्लिकनहरु यति ठूलो बिलको पक्षमा नभएपछि उक्त बिल सिनेटमा अगाडि बढ्न सकेको थिएन । अहिले त्यसमा १ ट्रिलियन डलरभन्दा बढी रकम कम गरेर ल्याइएको छ । आफूहरु १ ट्रिलियन घटेकाले रिपब्लिकनहरु १ ट्रिलियन बढेर उक्त बिलमा सहमति जनाउन डेमोक्रेटिक सांसदहरुले आग्रह गरेका छन् ।
डेमोक्र्याट्सहरुले ल्याएको नयाँ बिलमा सेप्टेम्बर ६ देखि नै लागु हुनेगरी आगामी जनवरी ३१ सम्म काम गुमाएकाहरुलाई बेरोजगारी विमा वा महामारी बेरोजगारी सहायताका अतिरिक्त साप्ताहिक ६ सय डलर दिने प्रावधान समेटिएको छ । साथै १२ सय डलरको दोश्रो चरणको राहत चेक दिने र आश्रीतहरुलाई अतिरिक्त ५ सय डलर दिने पनि बिलमा समेटिएको छ ।
स्थानीय र राज्य सरकारहरुलाई अतिरिक्त सहायताका लागि ४३६ बिलियन डलर दिने र पेचेक प्रोटेक्सन प्रोग्राम पनि चालु गर्ने विषय विलमा समावेश छ । विद्यालयहरुलाई सहायताका लागि २२५ बिलियन डलर र कोरोनाको परीक्षण र ट्रेसिंगका लागि ७५ बिलियन डलर प्रदान गर्ने विषय बिलमा छ ।