ट्रम्पले विजनेशबाट २०१६ मा जम्मा ७५० डलर ट्याक्स तिरेको खुलासा, २० बर्षको विवरण छताछुल्ल
प्रकाशित मिति : आश्विन ११, २०७७ आईतबार
अमेरिकी राष्ट्रपति डोनाल्ड ट्रम्पले सन् २०१६ मा आफ्नो विजनेशका तर्फबाट जम्मा ७५० डलर संघीय करवापत तिरेको खुलासा भएको छ । न्युयोर्क टाइम्सले आइतबार प्रकाशित गरेको रिपोर्ट अनुशार ट्रम्पले विजनेशका तर्फबाट सन् २०१७ मा पनि ७५० डलमात्र कर तिरेका छन् । त्योभन्दा अगाडि कैयन बर्ष उनले संघीय करबापत कुनै रकम नतिरेको रिपोर्ट प्रकाशित भएको छ । विजनेश घाटामा रहेको देखाएर ट्रम्पले कर छलेको टाइम्सको दावी छ ।
सन् २००० यताका १५ बर्षमध्ये १० बर्ष डोनाल्ड ट्रम्पले विजनेशबाट आयकरबापत कुनै रकम नतिरेको समेत खुलासा भएको छ ।
न्युयोर्क टाइम्सले ट्रम्प र उनको विजनेशको झण्डै २ दशकलामो ट्याक्स विवरण प्राप्त गरेको दावी गरेको छ । ट्रम्पले आफ्नो करको विवरण सार्वजनिक गर्न अस्वीकार गर्दै आएका थिए । ट्रम्प यसैबर्षको सुरुमा आफ्नो करको विवरणमा पहुच कायम गर्नबाट संसद र म्यानहटन डिस्ट्रिक्ट एटोर्नीलाई रोक्न सर्वोच्च अदालतमा समेत गएका थिए ।
ट्रम्पले अहिले पनि ७२ दशमलव ९ मिलियन ट्याक्स रिफण्डका लागि आईआरएससँग संघर्ष गरिरहेको रिपोर्टमा उल्लेख छ । यो रकम उनलाई सन् २०१० मा स्वीकृत गरिएको थियो । यदि ट्रम्पको दावी सही भएमा उनले उक्त रकम रिफण्डमा पाउनेछन् भने ट्रम्पले उक्त लडाई हारेको खण्डमा आईआरएसलाई १ सय मिलियन भन्दा बढी रकम तिर्नुपर्नेछ ।
ट्रम्पले भने न्युयोर्क टाइम्समा प्रकाशित उक्त रिपोर्ट गलत भएको दावी गरेका छन् । उनले राज्यलाई आयकरबापत प्रसस्त रकम तिरेको बताएका छन् । न्युयोर्क राज्यले अत्यन्तै धेरै रकम लिने भन्दै उनले राज्यलाई असाध्यै धेरै रकम तिरेको बताएका छन् । आईआरएसको अडिट सकिएपछि ट्याक्स रिटर्नको विवरण सार्वजनिक गर्ने ट्रम्पले बताएका छन् ।
यस्तो प्रतिवद्धता ट्रम्पले ४ बर्ष अगाडि समेत जनाएका थिए । तर अहिलेसम्म उनले ट्याक्सको कुनै विवरण सार्वजनिक गरेका छैनन् । ट्रम्पले अहिलेपनि विजनेशहरु चलाइहेका छन् । तर त्यसको दैनिक कामकाजको जिम्मा आफ्ना छोराहरु एरिक र डोनाल्ड जुनियरलाई दिएको बताएका छन् ।
ट्रम्प अर्गनाइजेशनका वकिल एलन गार्टेनले विगतका दशकमा ट्रम्पले व्यक्तिगत करवापत संघीय सरकारलाई दशौं मिलियन डलर तिरेको बताएका छन् । तर ट्रम्पको विजनेश ट्याक्सको विवरणबारे टाइम्सको रिपोर्ट आएपछि डेमोक्रेटिक सांसदहरुले यसबाट ट्रम्पको ब्यापार कसरी संचालन भएको छ भन्ने स्पष्ट भएको बताएका छन् ।
राष्ट्रपति चुनाव आउन ६ हप्ताभन्दा कम अवधि बाँकी रहँदा ट्रम्पको विजनेशबारे यस्तो खुलासा भएको हो । ट्रम्प र अर्का उम्मेदबार जो बाइडेनबीचको पहिलो बहस आउनभन्दा २ दिन अगाडिको यो खुलासाले चुनावमा असर पर्नेसक्ने अनुमान गरिएको छ । न्युयोर्क टाइम्सले अरु धेरै यस्ता रिपोर्टहरु प्रकाशित गर्ने खुलासा गरिसकेको छ ।
ट्रम्पको फ्लोरिडामा रहेको मार ए लागो रिसोर्टमा नयाँ सदस्यताबापतको शुल्कबाटमात्रै आम्दानी प्रतिवर्ष ५ मिलियन डलर बढेको टाइम्सको रिपोर्टमा उल्लेख छ । कागजपत्रमा ट्रम्पको कुल सम्पत्तिबारे पनि कुनै उल्लेख छैन भने रसियासँगको अज्ञात व्यापार सम्बन्धबारे पनि केही उल्लेख छैन ।