भिटामिन ‘डी’ ले कोरोनाबाट मृत्युको सम्भावना घटाउने, कमी हुनेलाई लिन डाक्टर फाउचीको सुझाव
प्रकाशित मिति : आश्विन ११, २०७७ आईतबार
भिटामिन ‘डी’ ले कोरोनाबाट मृत्युको सम्भावना घटाउने एक अध्ययनले पत्ता लगाए लगत्तै अमेरिकाका बरिष्ठ सरुवा रोग विशेषज्ञ डाक्टर एन्थोनी फाउचीले भिटामिन ‘डी ‘को कमी भएकाहरुलाई भिटामिन डी लिन सुझाव दिएका छन् । आफूले पनि भिटामिन ‘डी’ को पुरकहरु लिइरहेको बताउँदै उनले भिटामिन डीको कमी भएमा कोरोनाको संक्रमणका लागि संवेदनशील भएको बताएका छन् ।
रगतमा ३० नानोग्राम प्रति मिलिलिटर भिटामिन डीको मात्रा हुने व्यक्ति कोरोना संक्रमण भएपनि बेहोस हुने, मृत्यु हुने, रगतमा अक्सिजनको कमी हुने जस्ता समस्या कम देखिएको अनुसन्धानले पुष्टी गरेको छ । अध्ययनले प्रयाप्त भिटामिन डी भएको व्यक्तिमा कोरोना संक्रमणबा कारण जटिलता आउने समस्या कम देखिएको प्रत्यक्ष प्रमाणहरु प्रदान गरेको छ ।
उक्त रिपोर्टको पूर्ण पाठ यहाँ पढ्न सक्नुहुनेछ ।
भिटामिन डीले मांशपेशी र समग्र हड्डीको स्वास्थ्यमा भूमिका खेल्छ । भिटामिन डीको कमी भएमा बांगा र कमजोर हड्डीको निर्माण हुनसक्छ । तर कतिमात्रामा भिटामिन डीको कमी भएका कतिमात्रामा पुरक भिटामिन डी लिनसकिन्छ भन्नेबारेमा भने केही अन्यौल समेत देखिन्छ ।
भिटामिन डीको प्राथमिक श्रोत सूर्यको किरण हो भने साल्मन, टुना जस्ता माछाबाट पनि भिटामिन डी प्राप्त गर्न सकिन्छ । च्याउ र दुधपनि भिटामिन डीको श्रोत मानिन्छ । अमेरिकामा ५० प्रतिशत बालबालिका र ३५ प्रतिशत बयस्कहरुमा भिटामिन डीको कमी भएको एउटा शोधले देखाएको छ ।
भिटामिनको डीको कमी भए नभएको रगतको जाँचबाट पत्ता लगाउन सकिन्छ । विज्ञहरुका अनुशार भिटामिन डीको कमी भएमा सुरुको चरणका कुनै प्रत्यक्ष लक्षणहरु देखा पर्दैनन् । यद्यपी भिटामिन डीको कमी भएमा छाला बुढो देखिने र सुख्खा हुने समस्या हुनसक्छ ।
सूर्यको किरणबाट भिटामिन डी प्राप्त हुने भएपनि अमेरिकाको कुनै पनि स्थानमा विहान १० बजे अगाडि र दिउसो ३ बजे पछाडिको सूर्यको किरणबाट प्रयाप्त भिटामिन डी बनाउन नसकिने चिकित्सकहरु बताउँछन् ।