ट्रम्प प्रशासनले स्वीकृत गरेको भ्याक्सिन समेत न्युयोर्क राज्यले छुट्टै पुनरावलोकन गर्ने
प्रकाशित मिति : आश्विन ८, २०७७ बिहीबार
ट्रम्प प्रशासनले स्वीकृत गरेको कारोनाबिरुद्धको भ्याक्सिनको न्युयोर्क राज्यले छुट्टै पुनरावलोकन गरेरमात्र सर्वसाधारणका लागि प्रयोग गर्न स्वीकृति दिने भएको छ । कुनै पनि भ्याक्सिन अमेरिकी सरकारको खाद्य तथा औषधी प्रशासन एफडीएले स्वीकृत गरिसकेपछि पनि न्युयोर्कले आफ्नै पुनरावलोकन गर्ने गभर्नर एन्ड्रयु कुमोले बताएका छन् ।
ट्रम्प प्रशासनले कोरोनाबिरुद्धको भ्याक्सिनको पुनरावलोकन प्रकृयालाई राजनीतिकरण गरेको भन्दै कुमोले भ्याक्सिनबारे संघीय सरकारको धारणालाई आफूले विश्वास नगर्ने बताएका छन् । बिहिबार पत्रकार सम्मेलनमा बोल्दै कुमोले संघीय सरकारले स्वीकृति दिदैमा न्युयोर्कबासीलाई अतिरिक्त पुनरावलोकन विना भ्याक्सिन प्रयोगको सिफारिस नगर्ने बताए ।
भ्याक्सिन पुनरावलोकनका लागि डाक्टर, वैज्ञानिक र जनस्वास्थ्य विज्ञहरुको प्यानल बोलाउने उनले जानकारी दिए । राष्ट्रपति डोनाल्ड ट्रम्पले एफडीएलाई भ्याक्सिन तीब्र गतिमा स्वीकृतिका लागि दवाव दिइरहेका छन् । ट्रम्पले चुनाव अगाडि नै भ्याक्सिन स्वीकृत गराउन चाहन्छन् ।
नयाँ सर्वेक्षणमा अधिकांश अमेरिकनहरुले भ्याक्सिन स्वीकृत भएपनि लगाउन हतारो नगर्ने बताएका छन् । सर्वेक्षणमा सहभागी हरेक १० जनामध्ये कम्तीमा ६ जनाले स्वीकृत हुनासाथ भ्याक्सिन नलगाउने बताएका छन् ।
ट्रम्पले भने लगातार नोभेम्बर ३ भन्दा अगाडि नै भ्याक्सिन स्वीकृत हुने अनुमान गर्दै आएका छन् । नोभेम्बर र डिसेम्बरमा भ्याक्सिन स्वीकृत भएपनि निकै कममात्र डोज उपलब्ध हुने विज्ञहरुले बताएका छन् । सबैका लागि भ्याक्सिन उपलब्ध हुने अर्कोबर्षको मध्यसम्म लाग्ने अनुमान गरिएको छ ।
अहिले अमेरिकामा जोन्सन एण्ड जोन्सनले समेत तेश्रो चरणको क्लीनिकल परीक्षण सुरु गरिसकेको छ । यसअगाडि मोडेर्ना र फाइजरको तेश्रो चरणको क्लीनिकल परीक्षण अमेरिकामा चलिरहेको छ । आष्ट्राजेनेकाको तेश्रो चरणको क्लीनिकल परीक्षण सुरु भएपनि एकजना बिरामी भएपछि रोकिएको परीक्षण अमेरिकामा अझै सुचारु भएको छैन ।