आगामी दुईमहिनासम्म अमेरिकामा हरेक परिवारलाई हरेक दुईसातामा एकहजार डलर दिन सुझाव
प्रकाशित मिति : आश्विन ८, २०७७ बिहीबार
अमेरिकामा झण्डै १३ मिलियन अमेरिकनहरु वेरोजगार भएका छन् भने हजारौं विजनेशहरु स्थायीरुपमा नै बन्द भएका छन् । यो अवस्थामा अर्थतन्त्र रिकभरीका लागि अमेरिकामा रहेका हरेक परिवारलाई अझ धेरै राहत चेक आवश्यक भएको विज्ञहरुले बताएका छन् ।
दोश्रो चरणको राहत चेकसहितको प्याकेज अहिलेसम्म संसदले पारित गर्न सकेको छैन । यसबारेका सहमति पनि तत्कालै हुने सम्भावना देखिएको छैन । यो अवस्थामा अमेरिकाका अरबपति मार्क क्युबनले आगामी दुईमहिनासम्मका लागि अमेरिकामा हरेक परिवारलाई हरेक दुईसातामा एकहजार डलर दिन सुझाव दिएका छन् ।
अमेरिकामा अहिले दुईप्रकारका अर्थतन्त्र रहेको, एकाथरी तैरिन सफल भइरहेको र अर्काथरी तैरिन सफल नभएको बताएका छन् । संघर्ष गरिरहेका व्यक्ति र जनतालाई सहयोगको जरुरत रहेको उनले बताएका छन् । सहयोगका लागि उचित विकल्प भनेको अझ धेरै राहत चेकको वितरण रहेको उनको भनाई छ ।
अमेरिकामा रहेका हरेक परिवारले जतिसुकै आम्दानी भएपनि हरेक दुईसातामा एकहजार डलर प्राप्त गर्नुपर्ने उनको भनाई छ । उनले यस्तो विचार गत मे महिनामा पनि व्यक्त गरेका थिए । अहिले पनि उनी आफ्नो विचारमा अडिक रहेको बताएका छन् ।
उनले यसरी प्राप्त भएको रकम १० दिनभित्र खर्च गर्नुपर्ने अन्यथा रकम गुम्ने व्यवस्था गर्नुपर्ने उनको भनाई छ । यसो भएमा अर्थतन्त्र जीवित राख्नमा मद्दत पुग्ने उनको तर्क छ । तर के कुरामा खर्च गर्छन् भन्नेबारे भने नियन्त्रण गर्न नहुने उनको भनाई छ ।
१० दिनभित्र खर्च गर्नुपर्ने नियम नराखेमा अधिकांशले उक्त रकम बचत गरेर राख्ने भएकाले खर्च गर्नुपर्ने प्रावधान राख्नुपर्ने उनले तर्क गरेका हुन् । अमेरिकनहरु अहिले आफ्नो भविश्यबारे अनिश्चित भएकाले उनीहरुले अहिले प्राप्त भएको रकम खर्च गर्नुभन्दा बचत गरेर राख्नसक्ने देखिएको छ ।