चीनका लागि जासुसी गरेको आरोपमा न्युयोर्क पुलिस अफिसर पक्राउ
प्रकाशित मिति : आश्विन ६, २०७७ मंगलबार
न्युयोर्क पुलिसका एकजना अफिसरलाई चीनका लागि जासुसी गरेको आरोपमा सोमबार पक्राउ गरिएको छ । उनले आफ्ना तिब्बती मुलका सहकर्मीबिरुद्ध चीनका लागि जासुसी गरेको अभियोग लगाइएको छ ।
३३ बर्षका बाइमादाजे आङवाङले सुरक्षा सम्बन्धि गोप्य विवरणहरु अज्ञात व्यक्तिलाई पठाएको जनाइएको छ । खासगरी उनले चाइनिज कम्युनिष्ट पार्टीका विरोधीहरुको विवरण पठाएको अभियोग लगाइएको छ ।
आङवाङ तिब्बती मुलका नै रहेको र अमेरिकामा एसाइलम गरेर ग्रिनकार्ड प्राप्त गरेको जनाइएको छ । पछि उनले अमेरिकी नागरिकता प्राप्त गरेका थिए । उनी क्वीन्सको १११ औं प्रिसिंक्टमा कार्यरत रहँदै आएका थिए ।
उनी अमेरिकी सेनाको रिजर्भ फोर्सका सदस्य पनि हुन् । उनले अमेरिकी रक्षा मन्त्रालयबाट गोप्य स्तरको सुरक्षा क्लीयरेन्स प्राप्त गरेका थिए । उनले योग्यताको फर्म भर्दा कुनै पनि विदेशी सरकारसँग सम्बन्ध भएको अस्वीकार गरेका थिए ।
यद्यपी अदालतका कागजातमा आङवाङ सन् २०१८ देखि नै पीआरसी अधिकारी २ नामका अज्ञात व्यक्तिसँग सम्पर्कमा रहेको अभियोग छ । पीआरसी अधिकारी २ नामका ती अज्ञात व्यक्ति चाइनिज कम्प्युनिष्ट पार्टीसँग सम्बन्धित भएको आरोप छ ।
ती अज्ञात व्यक्तिलाई आङवाङले बोस भनेर सम्बोधन गर्ने गरेको जनाइएको छ । ती व्यक्तिले चाइनिज कम्युनिष्ट पार्टीको प्रशासन र नीति विरुद्धका श्रोतहरुलाई मत्थर पार्ने विभागमा काम गरेर विश्वास गरिएको छ ।
आङवाङले ती अज्ञात व्यक्तिलाई जुन २०१८ देखि मार्च २०२० सम्म कम्तीमा ५५ पटक फोन र मेसेज गरेको जनाइएको छ । आङवाङ न्युयोर्कको लङ आइल्याण्डमा बस्दै आएका छन् ।
उनले पीआरसी अधिकारी १ नामका व्यक्तिसँग पनि लगातार सम्पर्क गरेका थिए । सन् २०१४ को अगस्तदेखि सन् २०१७ को अगस्त सम्म कम्तीमा ५३ पटक सम्पर्क गरेको खुलासा भएको छ ।
आङवाङ अमेरिकामा कल्चरल एक्सचेन्ज भिसामा आएका थिए । दोश्रो पटक आएर ओभरस्टे भएका उनी चाइनिज सरकारबाट खतरा भएको भन्दै एसाइलम आवेदन दिएका थिए । तर उनी त्यसपछि कैयनपटक चीन पनि गएको जनाइएको छ ।
आङवाङका बाबु चाइनिज कम्प्युनिष्ट पार्टीका सदस्य रहेको र जनमुक्ति सेनाका रिटायर्ड अधिकारी रहेको जनाइएको छ । आङवाङकी आमा पनि रिटायर्ड सरकारी कर्मचारी रहेको जनाइएको छ । आङवाङका एकजना दाईपनि अहिले चीनको जनमुक्ति सेनामा कार्यरत छन् ।