बृहत राहत प्याकेजलाई समर्थन गर्न रिपब्लिकनलाई ट्रम्पको आव्हान
प्रकाशित मिति : भाद्र ३१, २०७७ बुधबार
कोरोनाभाइरस बृहत राहत प्याकेजलाई समर्थन गर्न रिपब्लिकनलाई अमेरिकी राष्ट्रपति डोनाल्ड ट्रम्पले आब्हान गरेका छन् । ह्वाइटहाउस र डेमोक्र्याट्सहरुबीच अहिलेसम्म राहत प्याकेजमा सहमति कायम हुन नसकेको बेलामा ट्रम्पको भनाई आएको हो । ट्रम्पको भनाईपछि डेमोक्र्याट्ससँग गत महिनादेखि रोकिएको वार्ता पुन सुचारु हुने अपेक्षा गरिएको छ ।
चुनावमा मुखमा नयाँ राहत प्याकेजका लागि केही गर्न नसकेका भन्दै हाउस स्पीकर न्यान्सी पेलोसीको केही डेमोक्रेटिक सांसदहरुबाटै आलोचना भइरहेको छ । ट्रम्पको भनाईले अब दुबै पक्षलाई दवाव पुगेको छ । ट्रम्पपनि चुनावको मुखमा आफ्नो पक्षमा माहौल बनाउन चुनाव अगाडि नै राहत प्याकेज ल्याउनुपर्ने पक्षमा देखिएका छन् ।
बुधबार बेलुका ह्वाइटहाउसमा बोल्दै ट्रम्पले मंगलबार हाउसका दुईदलका सांसदहरुले प्रस्ताव गरेको १ दशमलव ५ ट्रिलियन डलरको राहतमा सहमति जनाएका छन् । उक्त प्रस्तावमा दोश्रो चरणको १२ सय डलर र काम गुमाएकाहरुलाई २ महिनासम्म साप्ताहिक ४५० डलर दिने उल्लेख छ । त्यसपछि राज्यले दिने रकम सहित साप्ताहिक ६ सय भन्दा बढी नहुनेगरी प्रदान गरिने भएको छ ।
ट्रम्पले भनेका छन् – ‘म बढी रकमको राहत प्याकेजको पक्षमा छु । केही रिपब्लिकनहरु यसमा सहमत छैनन् । तर मेरो विचारमा म उनीहरुलाई कन्भिन्स गर्न सक्छु । किनभने मैले मान्छेहरुले रकम पाएको चाहन्छु ।’
बुधबार सहमतिको दिशामा अरु पनि प्रगति भएको छ । ट्रेजरी सेक्रेटरी स्टेभन मन्चिन र हाउस स्पीकर न्यान्सी पेलोसीबीच दुईहप्तापछि पहिलोपटक फोनमा कुराकानी भएको छ । हाउस छुट्टीमा जानु अगाडि नै राहत प्याकेज ल्याउनुपर्ने पक्षमा रहेका हाउसका डेमोक्रेटिक सांसदहरुको संख्या पनि बढ्दो रहेको छ ।