बर्षौं पहिले अमेरिका छाडेका अष्ट्रियनहरुले झुक्किएर पाए अमेरिकाको १२ सय डलरको राहत चेक


प्रकाशित मिति : भाद्र २६, २०७७ शुक्रबार

बर्षौं पहिले अमेरिका छाडेका अष्ट्रियनहरुले  अमेरिकाको १२ सय डलरको राहत चेक प्राप्त गरेको खुलासा भएको छ । वासिंटन पोष्टले प्रकाशित गरेको रिपोर्ट अनुशार सयौं अष्ट्रियनहरुले १२ सय डलरको अमेरिकी राहत चेक प्राप्त गरेको र तीमध्ये कैयन अयोग्य रहेको जनाइएको छ ।

यसअगाडि अमेरिका छाडेर गइसकेका विदेशी कामदारहरुले अमेरिकाको राहत चेक प्राप्त गरेको समाचार एनपीआरले प्रकाशित गरेको थियो । उनीहरु विगतमा अमेरिकामा अस्थायी प्रकारको कामदार भिसामा आएको र अहिले अमेरिका छाडेर आफ्नो देश फर्किसकेको जनाइएको छ ।

एउटा ट्याक्स फाइल गर्ने कम्पनीले कम्तीमा १२९ देशमा रहेका आफ्ना ग्राहकहरुले १२ सय डलरको अमेरिकी राहत चेक पाएको जनाएको छ । तर अधिकारीहरुले अयोग्य व्यक्तिले प्राप्त गरेको राहत चेक फिर्ता नगरे उनीहरु अमेरिका आउन अयोग्य हुनसक्ने चेतावनी दिएका छन् ।

अष्ट्रियाका बैंकहरुले पनि आफ्नो देशमा रहेका व्यक्तिका लागि अमेरिकी राहत चेक प्राप्त भएको निश्चित गरेका छन् । बैंकका अनुशार हालै जे भिसामा अमेरिका गएर काम गरेका तर अष्ट्रिया फर्किसकेकाहरुलेपनि उक्त चेक प्राप्त गरेका छन् ।

सुरुमा त उनीहरुले आफ्नो बैंक खातामा कुनै ठगले रकम पठाएका हुन् कि भनेर झुक्किएका थिए । तर पछि उनीहरुले अमेरिकाको राहत चेक आएको पत्ता लगाएका थिए ।

यसअगाडिको समाचारमा अष्ट्रेलियन हुन गएकोमा सच्याइएको छ । – सं

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com