न्युयोर्क सिटीका रेष्टुरेण्टहरुले सेप्टेम्बर ३० पछि २५ प्रतिशत क्षमतामा इन्डोर सेवा चलाउनसक्ने
प्रकाशित मिति : भाद्र २४, २०७७ बुधबार
न्युयोर्क सिटीका रेष्टुरेण्टहरुले सेप्टेम्बर ३० पछि २५ प्रतिशत क्षमतामा इन्डोर सेवा चलाउनसक्ने भएका छन् । तर त्यसका लागि मापदण्डहरु भने निकै कडा तोकिएको छ । गभर्नर एन्ड्रयु कुमोले सेप्टेम्बर ३० देखि रेष्टुरेण्टहरुले नियमको पालना गरेर इन्डोर सेवा संचालन गर्नसक्ने बताएका छन् ।
रेष्टुरेण्टहरु २५ प्रतिशत क्षमतामा मात्र संचालन गर्न पाइनेछ भने सबै ग्राहकहरुले सिटमा बस्नु अगाडिसम्म मास्क अनिवार्य लगाउनुपर्ने जनाइएको छ । सबैको तापक्रम चेक गरिनेछ भने खाना खान जाने समुहको कम्तीमा एकजनाको सम्पर्क ट्रेस गर्ने सुचनाहरु उपलब्ध गराउनुपर्नेछ ।
मदिराजन्य पदार्थको कारोबार हुनेगरी बार सेवा भने संचालन हुनेछैन । कसैले नियमको उल्लंघन गरेको पाइएमा सर्वसाधारणले अज्ञात रुपमा त्यस्ता रेष्टुरेण्टबिरुद्ध फोन वा मेसेजमार्फत रिपोर्ट गर्न सक्नेछन् ।
अहिले न्युयोर्कमा विगत ३३ दिनदेखि कोरोना संक्रमणदर १ प्रतिशतभन्दा कम रहेको छ । गभर्नर कुमोले संक्रमणदरमा मन्दीका लागि नोभेम्बर १ सम्मको डेडलाइन तोकेका छन् । त्यतीबेलासम्म पनि संक्रमणदर कम रहेमा इन्डोर सेवा दोब्बर बनाउन सकिनेछ ।
तर संक्रमणदर २ प्रतिशसम्म पुगेको खण्डमा भने रेष्टुरेण्टमा खाना खाने सेवा तत्कालै खारेज गरिनेछ । यदि संक्रमण बढेको खण्डमा स्थगन लागु गरिने कुमोले स्पष्ट पारेका छन् । कुमोले नियमको पालना नै मुख्य समस्या भएको बताएका छन् ।
रेष्टुरेण्ट व्यवसायीहरुले आफ्नो विजनेश मार्चदेखि यता ७० प्रतिशतले गिरावट आएको बताएका छन् । रेष्टुरेण्टहरुमा लगाइएको प्रतिबन्धबिरुद्ध केही रेष्टुरेण्ट व्यवसायीले गभर्नर कुमोबिरुद्ध मुद्दा समेत दायर गरेका छन् ।
