क्यालिफोर्नियामा काम गुमाएकालाई आजदेखि अतिरिक्त ९ सय पठाउन सुरु
प्रकाशित मिति : भाद्र २२, २०७७ सोमबार
क्यालिफोर्निया राज्यले आजदेखि काम गुमाएकाहरुलाई अतिरिक्त ९ सय डलर पठाउन सुरु गरेको छ । लेबर डेको अवशर पारेर क्यालिफोर्नियाले काम गुमाएहरुलाई अगस्त १ को सातादेखि लागु हुनेगरी तीनसाताको ९ सय डलर आजदेखि नै पठाउन सुरु गरेको हो ।
काम गुमाएका कारण बेरोजगारी विमा वा महामारी बेरोजगारी सहायता रकम प्राप्त गरिरहेकाहरुले यो अतिरिक्त रकम प्राप्त गर्नेछन् । राष्ट्रपछि डोनाल्ड ट्रम्पले कार्यकारी आदेशमार्फत साप्ताहिक ३ सयका दरले रकम प्रदान गर्ने व्यवस्था गरेका थिए । त्यसै अन्तरगत क्यालिफोर्नियाले एकमुष्ठ ९ सय पठाउन लागेको हो ।
सघीय कोषबाट क्यालिफोर्नियाबासीहरुले कुल ५ हप्ताका लागि १५ सय डलर पाउने भएका छन् । ९ सय एकमुष्ठ पाइसकेपछि काम गुमाएकाहरुले बाँकी ६ सय आगामी हप्ताहरुमा पाउनेछन् । सोमबार क्यालिफोर्निया लेबर सेक्रेटरी जुली ए सुले संघीय सरकारबाट ५ हप्ताका लागि साप्ताहिक तीनसय डलरको स्वीकृति पाएको जानकारी दिएकी छिन् ।
यसअगाडि काम गुमाएकाहरुले संघीय सरकारबाट साप्ताहिक ६ सय पाएका थिए । जसको अवधि जुलाईको अन्तिमसाता समाप्त भइसकेको छ । यो अवधि थप्नेबारे संसदमा सहमति हुन नसकेपछि ट्रम्पले कार्यकारी आदेशमार्फत साप्ताहिक ३ सयको व्यवस्था गरेका थिए ।
९ सय डलर आजैदेखि पठाउन सुरु गरेपनि सबै योग्यहरुले प्राप्त गर्न भने अझै केही दिन लाग्ने जनाइएको छ । आज कम्तीमा ३१ लाख काम गुमाएकाहरुलाई यो रकम पठाइने जनाइएको छ । क्यालिफोर्नियामा अतिरिक्त १२ लाख आवेदकले भने कोरोनाको महामारीका कारण काम गुमाएको पुष्टी गर्न बाँकी रहेको जनाइएको छ ।
उनीहरुलाई सेप्टेम्बर १५ भित्र त्यसको सुचना पठाइने भएको छ । त्यस्तै १ लाख ९२ हजारले भने अतिरिक्त ३ सय डलर नपाउने जनाइएको छ । किनभने उनीहरुले साप्ताहिक १ सय डलरभन्दा कम रकम प्राप्त गरिरहेका छन् । अतिरिक्त ३ सयका लागि योग्य नहुनेहरुले औषतमा साप्ताहिक ६८ डलर पाइरहेको जनाइएको छ ।
क्यालिफोर्नियामा गतसातामात्र ५० लाख काम गुमाएकाहरुलाई बेरोजगारी विमा रकम वा महामारी बेरोजगारी सहायता रकम प्रदान गरिएको थियो । त्यसमध्ये ३४ लाख नियमित बेरोजगारी विमा रकम पाउनेहरु र १६ लाख महामारी बेरोजगारी सहायता रकम पाउनेहरु रहेका थिए ।
