अमेरिकामा कम आम्दानी हुने १ करोड परिवारलाई टी मोबाइलले निशुल्क इन्टरनेट दिने
प्रकाशित मिति : भाद्र २०, २०७७ शनिबार
अमेरिकन मोबाइल नेटवर्क कम्पनी टी मोबाइलले झण्डै १ करोड विद्यार्थीहरुलाई निशुल्क इन्टरनेट सेवा दिने योजना ल्याएको छ । कम्पनीले १० दशमलव ७ बिलियन डलरको योजनाको घोषणा गरेको छ ।
खासगरी विद्यालय पछि इन्टरनेटको माध्यमबाट घरमा सिक्नुपर्ने वा होमवर्क गर्नुपर्ने विद्यार्थीहरुलाई निशुल्क सेवा दिइने भएको छ । कम मूल्यको र निशुल्क स्कुल लन्चका लागि योग्य हुने सबै विद्यार्थीहरु यो सेवाका लागि योग्य हुने जनाइएको छ ।
१० बर्षको कार्यक्रम अन्तरगत लाखौं कम आम्दानी भएका परिवारहरुले निशुल्क वायरलेस हटस्पटहरु र निशुल्क हाइस्पीड डाटा प्राप्त गर्नेछन् । मुलुकभरका स्कुल डिस्ट्रिक्टसँगको सहकार्यमा यो कार्यक्रम लागु गरिने भएको छ ।
महामारीभन्दा अगाडि समेत अमेरिकामा झण्डै ९० लाख विद्यार्थीहरुले होमवर्क गर्नका लागि राम्रो इन्टरनेटको सुविधाबाट वञ्चित रहँदै आएका थिए । अमेरिकामा झण्डै साढे ५ करोड विद्यालय उमेरका बालबालिकाहरु रहेका छन् । अहिले कोरोनाको महामारीका कारण झण्डै ५ करोड विद्यार्थीहरुले विद्यालय नगईकनै सिकिरहेका छन् ।
कम आम्दानी भएका परिवारका विद्यार्थीहरु कुनै पनि प्रकारका डिजिटल क्लासरुममा सहभागी हुनबाट वञ्चित भइरहेका छन् । त्यो अवस्था आउन नदिनका लागि टी मोबाइलले यो योजना ल्याएको हो । यो योजनाको घोषणा सन् २०१९ मा नै गरिएपनि अहिले कार्यान्वयनको चरणमा रहेको छ ।