नर्थ क्यारोलिनाको संसदबाट घरघरमा राहत चेक पठाउने बिल पारित, बेरोजगारी विमामा ५० डलर थपिने
प्रकाशित मिति : भाद्र २०, २०७७ शनिबार
नर्थ क्यारोलिनाको राज्य संसदले कम्तीमा एकटा बच्चा भएका परिवारका बुबाआमालाई राहत रकम उपलब्ध गराउनका लागि एक बिलियन डलरको कोरोनाभाइरस राहत बिल पारित गरेको छ । जसअन्तरगत राज्यमा कम्तीमा एउटा बच्चा भएको परिवारमा ३३५ डलरको चेक बैंक खातामा वा हुलाकमार्फत पठाइने भएको छ ।
राज्यको सिनेटमा बिलका पक्षमा ४४ मत र विपक्षमा ५ मत खसेको थियो भने राज्यको तल्लो सदनमा बिलका पक्षमा १०४ मत र विपक्षमा १० मत खसेको थियो । ३३५ डलर धेरै ठूलो रकम नभएपनि यसले परिवारमा सानातिना बिल तिर्न मद्दत पुग्ने सिनेटका नेता फिल बर्जरले विश्वास व्यक्त गरेका छन् ।
रिपब्लिकन नेता बर्जरले बुबाआमाहरुले यो रकम कसरी खर्च गर्लान् भन्नेबारे आफूलाई चिन्ता नभएको तर उनीहरुका लागि यो आवश्यक भएको बताएका छन् । हरेक परिवारमा ३३५ डलर पठाउँदा कुल ४४० मिलियन डलर लाग्ने जनाइएको छ ।
त्यस्तै बेरोजगारी विमा रकममा पनि ५० डलर बढाएर दिइने भएको छ । यो रकम राष्ट्रपति डोनाल्ड ट्रम्पको कार्यकारी आदेशले प्रदान गर्ने साप्ताहिक ३ सय डलरको अतिरिक्त प्रदान गरिने जनाइएको छ । नर्थ क्यारोलिनमा काम गुमाएहरुले उनीहरुको साप्ताहिक ज्यालाको आधा रकम पाउने गरेका छन् ।
यो बिलले कोरोनाभाइरसको परीक्षण लगायतका क्षेत्रमा पनि रकम उपलब्ध गराउने भएको छ । साथै चुनावमा दिनमा खट्नेहरुका लागि अतिरिक्त १ सय डलर प्रदान गरिने भएको छ । परिवारलाई दिइने ३३५ डलर आउन भने डिसेम्बर १५ सम्म लाग्ने जनाइएको छ ।
नर्थ क्यारोलिनाको संसदले राहत चेक उपलब्ध गराउने बिल पारित गरेपनि संघीय संसदले भने यसबारेको बिल पारित गर्न सकेको छैन । ह्वाइट हाउस र डेमोक्र्याट्सबीच सहमति कायम हुन नसक्दा यसबारे कुनै प्रगति भएको छैन ।