विश्वमा कोरोनाको नयाँ इपीसेन्टर बन्दै भारत, मृतक संख्यामा मेक्सिकोलाई उछिनेर विश्वमा तेश्रो
प्रकाशित मिति : भाद्र १५, २०७७ सोमबार
विश्वभर सबैभन्दा धेरै कोरोना संक्रमण पुष्टी हुनेमा तेश्रो नम्बरमा रहेको भारतले कोरोनाबाट ज्यान गुमाउनेको संख्यामा पनि मेक्सिकोलाई उछिनेर तेश्रो भएको छ । भारतमा अहिलेसम्म झण्डै ३७ लाखमा कोरोना संक्रमण पुष्टी भइसकेको छ भने मृतकको संख्या ६५ हजार नाघेको छ ।
एकदिनमा संक्रमण पुष्टी हुनेमा पनि भारत निकै अगाडि रहेको छ । सोमबारमात्र ७८ हजारभन्दा धेरै संक्रमण पुष्टी हुनेहरु थपिएका छन् । आइतबारपनि भारतले एकैदिनमा विश्वभरका मुख्य देशहरुमध्ये सबैभन्दा धेरै संक्रमितको संख्या रिपोर्ट गरेको थियो ।
यही गतिमा संक्रमितको संख्या बढेमा भारतले ब्राजिललाई एकसातामा उछिन्नेछ भने अमेरिकालाई २ महिनामा उछिन्नेछ । विश्वमा सबैभन्दा धेरै कोरोना संक्रमण पुष्टी हुने र मृतक संख्यमा अमेरिका पहिलो नम्बरमा रहेको छ । अमेरिकामा अहिलेसम्म ६२ लाख बढीमा संक्रमण पुष्टी भएको छ भने १ लाख ८७ हजारभन्दा धेरैको मृत्यु भएको छ ।
दोश्रो नम्बरमा रहेको ब्राजिलमा ३९ लाख बढीमा संक्रमण पुष्टी भएको छ भने १ लाख २१ हजारभन्दा धेरैको मृत्यु भएको छ । अहिलेसम्म संक्रमितसंख्यामा भारत तेश्रो नम्बरमा रहेपनि मृतक संख्यामा मेक्सिको अगाडि रहेको थियो । अब भारतले मृतक संख्यामा पनि मेक्सिकोलाई उछिनेको छ ।
विश्वको सबैभन्दा दोश्रो ठूलो जनसंख्या भएको देश तथा कमजोर सार्वजनिक स्वास्थ्य प्रणाली रहेको भारत विश्वमै सबैभन्दा धेरै संक्रमित पुष्टी हुने देशमा आउन धेरै समय नलाग्ने राष्ट्रिय सरुवारोग प्रतिष्ठान भारतका नमन शाहले बताएका छन् । भारत कोरोनाको नयाँ इपीसेन्टर हुनेमा कुनै आशंका नरहेको सरकारी टास्क फोर्सका सदस्य समेत रहेका शाहले बताएका छन् ।
भारतमा संक्रमणको दर उच्च रहँदा त्यसबाट छिमेकी मुलुक नेपालमा पर्ने असरबारे पनि चिन्ता व्यक्त गरिएको छ । नेपालमा संक्रमितको संख्या ४० हजारको नजिक रहेको छ भने मृतकको संख्या २ सय नाघिसकेको छ ।