युनाइटेड एयरलाइन्सले उडान मिति परिवर्तन गर्दा लिने शुल्क सधैका लागि हटाउने
प्रकाशित मिति : भाद्र १४, २०७७ आईतबार
अमेरिकामा युनाइटेड एयरलाइन्सले उडान मिति परिवर्तन गर्दा लिने शुल्क सधैका लागि हटाउने भएको छ । यसअगाडि साउनवेष्टले उडान मिति परिवर्तन गर्दा लाग्ने शुल्क हटाउने निर्णय गरेको थियो ।
युनाइटेड एयरलाइन्सले आन्तरिक उडानमा मिति परिवर्तन गर्दा लाग्ने शुल्क खारेज गर्ने जनाएको छ । कोरानाको कारण यात्रामा अनिश्चितता भएको अवस्थामा यात्रामिति परिवर्तन गर्दा अब यात्रुहरुले थप शुल्क तिर्नुनपर्ने भएको छ ।
उडानको मिति परिवर्तन गर्दा पूर्णरुपमा थप शुल्क नलिने पहिलो विमानसेवा युनाइटेड एयरलाइन्स भएको छ । साउथवेस्ट एयरलायन्सले टिकटको मिति परिवर्तन गर्दामात्र होइन, ब्यागेज शुल्कसमेत नलिने घोषणा गरिसकेको छ ।
अधिकांश एयरलाइन्सहरुले उडानको मिति परिवर्तन गर्दा २ सय देखि ५ सय डलरसम्म शुल्क लिने गरेका थिए । कहिलेकाँही टिकटको मूल्यभन्दा पनि अतिरिक्त शुल्क बढी हुने समस्या रहेको थियो ।
युनाइटेड एयरलाइन्स होल्डिंगले गतबर्षमात्र टिकटको मिति परिवर्तनबाटमात्र ६२५ मिलियन डलर कमाएको थियो । त्यसमध्ये ५५ प्रतिशत आन्तरिक उडानबाट भएको जनाइएको छ ।
अमेरिकाका एयरलाइन्सहरुले टिकटको मिति परिवर्तन र रद्द गर्दा गतबर्ष २ दशमलव ८ बिलियन डलर कमाएका थिए ।
संघीय सहायता नपाएको खण्डमा आगामी महिनाहरुमा युनाइटेड एयरलाइन्सले आफ्ना २८५० पाइलटहरुलाई वेतलवी विदा दिने जनाएको छ । त्यस्तै अरु ३६ हजार कर्मचारीहरुलाई समेत विदा दिने बताएको छ ।