न्युयोर्कको ट्रेन स्टेशनमा दिउसो बलात्कार प्रयास गर्ने पक्राउ
प्रकाशित मिति : भाद्र १४, २०७७ आईतबार
न्युयोर्कको ट्रेन स्टेशनमा दिउसो बलात्कारको प्रयास गर्ने ३१ बर्षको एकजना पुरुषलाई प्रहरीले आइतबार पक्राउ गरेको छ । होजे रेयस नामको उक्त व्यक्तिले शनिबार विहान ११ बजे लेक्जिङटन एभिन्यु र इस्ट ६३ स्ट्रीटको एफ ट्रेन स्टेशनमा बलात्कार प्रयास गरेको जनाइएको छ ।
२५ बर्षकी महिलामाथि बलात्कारको प्रयास गर्दै झम्टिएको बेला अन्य न्युयोर्कबासीले देखेपछि उसको प्रयास असफल भएको थियो । त्यसको भिडियो समेत सार्वजनिक भएको थियो । प्रत्यक्षदर्शीले खिचेको भिडियो हेरेर प्रहरीले उक्त व्यक्तिलाई पक्राउ गर्न सफल भएको हो ।
सुरुमा ट्रेनभित्र उक्त व्यक्तिले हुक्काजस्तो पदार्थ धुमपान गरेर अनौठो किसिमको आवाज निकालेको थियो । र ति महिलातिर हेरेर एक्लै हासेको थियो । जब ती महिला ट्रेनबाट बाहिर निस्केकी थिइन्, तब त्यो व्यक्तिले आफ्नो यौनांगमा हात लगेर महिलाको पिछा गरेको थियो ।
केहीबेरमा नै महिलालाई झम्टेर उसले बलात्कार प्रयास गरेको थियो । लगत्तै भींड जम्मा भएर चिच्याउन थालेको थियो । भींडले अवरोध श्रृजना गरेपछि त्यो व्यक्ति घटनास्थलबाट भागेको थियो ।
महिलालाई सामान्य चोटपटक लागेको बताइएको छ । तर उनले अस्पताल जान भने अस्वीकार गरेकी छिन् । होजे रेयसलाई प्रहरीले बलात्कारको प्रयास, यौनजन्य आक्रमण, दुब्र्यबहार र आक्रमणको अभियोग लगाएको छ ।
उक्त व्यक्तिको रेकर्ड हेर्दा विगतमा पनि लुटपाट, सानाठूला चोरी, प्रहरी अधिकारीमाथि नै आक्रमण लगायतका अपराधमा संलग्न भएको देखिएको छ । विगतमा तीनपटक ट्रेन स्टेशनमा पक्राउ परेपनि विगतका घटनाभने यौन आक्रमणसँग सम्बन्धित नभएको प्रहरीले जनाएको छ ।