भ्याक्सिनलेमात्र कोरोना महामारी समाप्त पार्न नसक्ने विश्व स्वास्थ्य संगठनको चेतावनी
प्रकाशित मिति : भाद्र ५, २०७७ शुक्रबार
भ्याक्सिनलेमात्र कोरोना महामारी समाप्त पार्न नसक्ने विश्व स्वास्थ्य संगठनले चेतावनी दिएको छ । शुक्रबार विश्व स्वास्थ्य संगठनका प्रमुख टेडरोस एडनम घेब्रेसियसले पत्रकार सम्मेलनका क्रममा भ्याक्सिन महत्वपूर्ण उपकरण भएपनि यसले महामारी अन्त्य गर्न नसक्ने बताएका हुन् ।
विश्व नेताहरु र सर्वसाधारणहरुले भाइरसको व्यवस्थापन र उनीहरुको दैनिक जीवनमा स्थायी समायोजन गरेरमात्र भाइरसलाई न्यून तहमा झार्न सकिने उनले बताए । भ्याक्सिन निर्माण हुँदैमा पहिलेकै अवस्थामा जान नसकिने उनको भनाई छ ।
विगतका इतिहासहरुमा महामारीहरुले अर्थतन्त्र र समाजहरु परिवर्तन गरेको इतिहास रहेको उनले बताए । अहिलेसम्म विश्वभर २२ मिलियनभन्दा धेरैमा भाइरस संक्रमण पुष्टी भइसकेको छ भने झण्डै ८ लाखको मृत्यु भइसकेको छ ।
अहिले झण्डै ३० वटा कोरोना भाइरसबिरुद्धका सम्भावित भ्याक्सिनहरु परीक्षणका क्रममा रहेका छन् । तर ती भ्याक्सिनहरु सुरक्षित र प्रभावकारी हुने कुनै ग्यारेन्टी नभएको घेब्रेसियसले बताए ।
यसैमहिनाको सुरुतिर पनि घेब्रेसियसले कोरोनाबिरुद्धको भ्याक्सिन सिल्भर बुलेट बन्न नसक्ने बताएका थिए । महामारीका बेलामा हरेक व्यक्तिले प्रभाव पार्नसक्ने भएकाले स्वास्थ्य मापदण्डको पालना गर्न सुझाव दिएका छन् ।