आर्थिक राहत लगायतका ४ कार्यकारी आदेशको तयारीमा ट्रम्प, पत्रकार सम्मेलन लाइभ
प्रकाशित मिति : श्रावण २४, २०७७ शनिबार
अमेरिकी राष्ट्रपति डोनाल्ड ट्रम्पले कोरोना भाइरस आर्थिक राहत लगायतका ४ कार्यकारी आदेशको तयारी गरेको जनाइएको छ । यसैबीच न्युजर्सीमा ट्रम्पले पत्रकार सम्मेलन आयोजना गरेका छन् ।
ट्रम्पले जारी गर्ने भनिएका कार्यकारी आदेश मध्ये एकले लाखौंका लागि बेरोजगारी सहायतालाई ब्यूताउने जनाइएको छ । अरु दुईवटा कार्यकारी आदेशहरु भाडा नतिरेकाहरुलाई घरबाट निकाल्नबाट रोक लगाउने आदेशहरु हुन् । चौथो आदेश पेरोल ट्याक्सलाई पछाडि सार्नका लागि रहेको जनाइएको छ ।
हेर्नुहोस् पत्रकार सम्मेलनको लाइभ भिडियो ।
यस अगाडि शुक्रबार राती न्युजर्सीको क्लबमा पत्रकार सम्मेलन गर्दै राष्ट्रपति ट्रम्पले कार्यकारी आदेशमार्फत यो बर्षभर नै बेरोजगारी विमाको रकम बढाउने बताएका थिए । काम गुमाएकाहरुलाई साप्ताहिक ६ सय डलरको अवधिका विषयमा डेमाक्रेटिक सांसदहरुसँग कुरा नमिलेको बेलामा ट्रम्पको यो भनाई आएको हो ।
ट्रम्पले पेरोल ट्याक्स, भाडा नतिरेकाहरुलाई घरबाट निकाल्नबाट रोक, काम गुमाएकालाई संघीय सरकारले दिदै आएको अतिरिक्त रकमको निरन्तरता लगायतका विषयमा कार्यकारी आदेश जारी गर्ने बताए । त्यस्तै विद्यार्थीको ऋण तिर्ने अवधि पछि सार्ने विषयलाई पनि समेट्ने उनको भनाई छ ।
पेरोल ट्याक्स तिर्ने अवधि पछि सार्ने विषयमा छलफल भइरहेको उनले बताए । उनले यो साताको अन्त्यसम्ममा कार्यकारी आदेशमा हस्ताक्षर गर्ने बताएका छन् । अहिले कानुनविदहरुले कार्यकारी आदेशको भाषा तयार गरिरहेको उनले खुलासा गरे ।
ट्रम्पले जुलाई महिनामा अमेरिकामा थपिएको जागिर ऐतिहासिक भएको भन्दै पत्रकारसम्मेलनको सुरुवात गरेका थिए । अमेरिकामा जुलाईमामात्र १८ लाख जागिर थपिएका छन् ।
शुक्रबारमात्र ह्वाइटहाउसका वार्ताकारसँग हाउस स्पीकार न्यान्सी पेलोसी र सिनेटमा डेमोक्रेटिक नेता चक शुमरबीचको वार्ता निष्कष्र्काविहिन भएको थियो । लगत्तै ट्रेजरी सेक्रेटरी स्टेभन मन्चिनले ट्रम्पलाई कार्यकारी आदेश जारी गर्न सुझाव दिएका थिए । आगामी राहत प्याकेज साढे ३ ट्रिलियन बनाउने डेमोक्रेटिक सांसदको प्रस्ताव र एक ट्रिलियनको हाराहारीमा बनाउने ह्वाइट हाउसको प्रस्तावबीच कुरा नमिलेपछि वार्ता निष्कर्षविहिन भएको थियो ।