अन्तत : मास्कको पक्षमा ट्रम्प, ट्वीट गर्दै भने -‘मजस्तो देशभक्त अरु कोही छैन’
प्रकाशित मिति : श्रावण ५, २०७७ सोमबार
मास्कको विषयमा अमेरिकी राष्ट्रपति डोनाल्ड ट्रम्पको आलोचना भएपछि ट्रम्पले सोमबार मास्क लगाएको तस्वीर ट्वीट गर्दै आफू देशभक्त भएको उल्लेख गरेका छन् । केहीदिन अगाडि वाल्टर रिड अस्पताल गएको बेलामा खिचेको मास्क लगाएको तस्वीर ट्वीट गर्दै ट्रम्पले भनेका छन् – ‘हामी अदृश्य चाइना भाइरसलाई परास्त्र गर्न हाम्रा प्रयासहरुमा एकजुट छौं ।’
ट्रम्पले ट्वीटमा अगाडि लेखेका छन् – ‘सामाजिक दुरी कायम गर्न नसकेको अवस्थामा मास्क लगाउनु देशभक्तिपूर्ण हुने कुरा धेरैले बताएका छन् । मभन्दा देशभक्त अरु कोही छैन । तपाईको मनपर्ने राष्ट्रपति ।’
ट्रम्पले आइतबारमात्र फक्स न्युजमा प्रशारण गरिएको एउटा अन्तरवार्तामा सबैले मास्क नलगाउन भनेकाले आफूले मास्क नलगाउने बताएका थिए । तर आजको ट्वीटमा उनले मास्क लगाउने कुरालाई देशभक्तिपूर्ण बताएका छन् ।
We are United in our effort to defeat the Invisible China Virus, and many people say that it is Patriotic to wear a face mask when you can’t socially distance. There is nobody more Patriotic than me, your favorite President! pic.twitter.com/iQOd1whktN
— Donald J. Trump (@realDonaldTrump) July 20, 2020
सीडीसीले मास्क लगाउनुपर्ने बताएको झण्डै तीनमहिनापछि ट्रम्पले मास्कको पक्षमा ट्वीट गरेका हुन् । ट्रम्पका सहयोगीहरुले ट्रम्पलाई अमेरिकाको झण्डा वा मेक अमेरिका ग्रेट अगेनका लोगो वा ट्रम्प पेन्स २०२० लेखेको मास्क लगाउन प्रेरित गर्दै आएका थिए । तर ट्रम्पले त्यसलाई अस्वीकार गर्दै एकपटकमात्र मास्क लगाएका थिए ।
राष्ट्रपतिका सल्लाहकारका अनुशार उनका सहयोगीहरुले गरेको अत्यन्तै भारी अनुरोधपछिमात्र ट्रम्पले गतसाता वाल्टर रिड अस्पताल जाने बेलामा मास्क लगाएका थिए । अहिले कैयन रिपब्लिकन राज्यहरुमा कोरोनाको महामारी फैलिदै गएपछि रिपब्लिकन अधिकारीहरुले मास्क लगाउने कुराका पक्षमा सार्वजनिक रुपमा नै अनुरोध गर्दै आएका छन् ।
ट्रम्पका सल्लाहकारहरुले मास्क लगाउने विषयलाई राजनीतिक सफलतासँग समेत जोडेपछि ट्रम्प अन्तत मास्कको पक्षमा देखिएका छन् । मतदाताहरुमा कोरोनाको विषय सबैभन्दा चासोको विषय रहेको सन्दर्भमा ट्रम्प सर्वेक्षणमा पछाडि देखिएपछि सल्लाहकारहरुले मास्क लगाउँदा मतदाताको मन जित्नसकिने सुझाव दिएका थिए ।