ट्रम्प भन्छन् – ‘सबैले मास्क नलगाउनु भनेका छन्, मास्क लगाउँदिन’
प्रकाशित मिति : श्रावण ४, २०७७ आईतबार
अमेरिकी राष्ट्रपति डोनाल्ड ट्रम्पले सबैले मास्क नलगाउनु भनेकाले मास्कको नियम पालना नगर्ने बताएका छन् । फक्स न्युजमा आज प्रशारण गरिएको अन्तरवार्तामा ट्रम्पले संघीय मास्कको जनादेश आफूले स्वीकार नगर्ने बताएका छन् ।
ट्रम्पले भनेका छन् -‘डाक्टर फाउचीले मास्क नलगाउनु भनेका छन् । हाम्रा सर्जन जनरलले मास्क नलगाउनु भनेका छन् । सबैले मास्क नलगाउनु भनेका थिए । तर अहिले सबैले अचानक मास्क लगाउनुपर्ने भएको छ । तपाईलाई थाहा भएजस्तै मास्कले समस्याहरु निम्त्याउँछ ।’
तर ट्रम्पले भनेजस्तै डाक्टर एन्थोनी फाउची, सर्जन जनरल जेरोम आडम्स वा अन्य स्वास्थ्य अधिकारीहरुले अहिले मास्क लगाउनु नपर्ने बताएका छैनन् । उनीहरुले गत फरबरी र मार्चमा भनेको कुरालाई आधार बनाएर ट्रम्पले मास्क लगाउनु नपर्ने बताएका छन् । अहिले फाउची, आडम्स वा अन्य स्वास्थ्य अधिकारीहरु, सीडीसी र विश्व स्वास्थ्य संगठनसमेत मास्क लगाउनुपर्नेमा सहमत छन् ।
स्वास्थ्य संगठन र अधिकारीहरुले अहिले कोरोनाको महामारी फैलिनबाट रोक्न मास्क लगाउन अनिवार्य रहेको बताइरहेका छन् । सीडीसीका निर्देशक रोबर्ट रेडफिल्डले त चारदेखि आठ हप्तासम्म सबैले मास्क लगाएको खण्डमा कोरोना फैलिने क्रम रोकिने बताएका छन् ।
एउटा स्वास्थ्य सम्बन्धि मुल्यांकनले त ९५ प्रतिशत अमेरिकनहरुले मास्क लगाउने हो भने अक्टोबरसम्म कम्तीमा ३३ हजारको ज्यान जानबाट जोगिने निष्कर्ष निकालेको छ । कोरोना भाइरस विना लक्षण पनि फैलिने भएकाले सीडीसीदेखि स्वास्थ्य अधिकारीहरु मास्क लगाउनुपर्ने निष्कर्षमा पुगेका हुन् ।
कोरोनाको महामारी सुरुभएयता अमेरिकी राष्ट्रपति डोनाल्ड ट्रम्पले गतसाता पहिलोपटक मास्क लगाएका थिए । वासिंटनबाहिरको वाल्टर रिड सैन्य अस्पतालको भ्रमणका क्रममा ट्रम्पले मास्क लगाएका थिए ।
अस्पतालमा ट्रम्पले घाइते सिपाहीहरु र स्वास्थ्यकर्मीहरुलाई भेटेका थिए । उनले राष्ट्रपतिका डेमोक्रेटिक उम्मेदवार जो बाइडेनलाई मास्क लगाएकोमा खिसी गर्दै आफूले मास्क नलगाउने बताएका थिए । ट्रम्पले मास्क नलगाएपछि अमेरिकामा कैयन ट्रम्प समर्थकहरु पनि मास्क नलगाई हिड्ने गरेका थिए ।
