नोभम्बरमा बाइडेनले चुनाव जीतेमा परिणाम स्वीकार्नेबारे बताउन ट्रम्पबाट अस्वीकार (भिडियो)
प्रकाशित मिति : श्रावण ४, २०७७ आईतबार
आगामी नोभेम्बरमा हुने अमेरिकी राष्ट्रपतिको चुनावमा जो बाइडेनमा चुनाव जीतेमा उक्त परिणाम स्वीकार्नेबारे बताउन अमेरिकी राष्ट्रपति डोनाल्ड ट्रम्पले अस्वीकार गरेका छन् । फक्स न्युजमा आज प्रशारण गरिएको अन्तरवार्तामा ट्रम्पले आफूले हारेमा चुनावी परिणाम स्वीकार्ने वा नस्वीकार्ने भन्नेबारे बताउन चाहेनन् ।
ट्रम्पले आफूले चुनाव नहार्ने र सर्वेक्षणहरु फेक भएको बताएका छन् । चुनावमा हारेमा परिणाम स्वीकार गर्नुहुन्छ कि हुन्न भन्ने प्रश्नमा ट्रम्पले भने – ‘हेरौं के हुन्छ । म स्वीकार गर्छु पनि भन्दिन । र स्वीकार गर्दिन पनि भन्दिन । पहिलेको चुनावमा पनि मैले भनेको थिइन ।’
सर्वेक्षणहरुमा दर्ता भएका मतदाताहरुमध्ये बाइडेनले राष्ट्रव्यापी रुपमा नै १५ प्रतिशतले अग्रता ल्याएपछि डोनाल्ड ट्रम्पको पकड कमजोर भएको विश्लेषण गरिएको छ । आइतबार सार्वजनिक मुख्य सर्वेक्षणहरुले ट्रम्पको पकड कम भएको सार्वजनिक गरेका छन् ।
एबीसी न्यूज र वासिंटन पोष्टको पोलमा समेत बाइडेनले अग्रता कायम गरेका छन् । फक्स न्युजले सार्वजनिक गरेको पोलमा समेत बाइडेनको ८ प्वाइन्टको अग्रता देखिएको छ ।