सर्वेक्षणमा ट्रम्पभन्दा बाइडेन ठूलो मतान्तरले अगाडि, ट्रम्पका लागि चुनौती बढ्दै
प्रकाशित मिति : श्रावण ४, २०७७ आईतबार
अमेरिकी राष्ट्रपति डोनाल्ड ट्रम्पले आगामी नोभेम्बरमा हुने राष्ट्रपतिको चुनावमा डेमोक्रेटिक उम्मेदवार जो बाइडेनलाई जितेर पुननिर्वाचित हुनका लागि ठूलो चुनौतीको सामना गरिरहेका छन् । विभिन्न सर्वेक्षणहरुमा बाइडेनको भारी अग्रताका कारण र कमजोर अर्थतन्त्र तथा कोरोना महामारीका बारण ट्रम्पको स्वीकृति दरमा आएको कमीका कारण ट्रम्पमाथि चुनौती थपिएको हो ।
एबीसी न्यूज र वासिंटन पोष्टको सर्वेक्षणमा बाइडेनले रजिस्ट्रर्ड मतदाताका बीचमा डोनाल्ड ट्रम्पलाई ५५ देखि ४० प्रतिशतसम्मले लिड गरिरहेका छन् । गतहप्ता एनबीसी न्युज, वाल स्ट्रीट जर्नल र क्वीनिपियाक युनिभर्सिटीको सर्वेक्षणमा पनि बाइडेनलाई डबल डिजिटको अग्रता कायम रहेको पाइएको थियो ।
पछिल्ला सर्वेक्षणहरुमा बाइडेन खासगरी उपनगरहरुमा अग्रता कायम गरिरहेका छन् । एबीसी न्यूज र वासिंटन पोष्टको सर्वेक्षणमा उपनगरहका मतदातामाझ बाइडेन ५२ देखि ४३ प्रतिशतको मार्जिनले अगाडि रहेका छन् । फक्स न्युजको सर्वेक्षणमा समेत बाइडेनको ५५ देखि ३३ प्रतिशतसम्म अग्रता देखिएको थियो ।
सबै सर्वेक्षणहरुको मुल्यांकन गर्दा बाइडेन उपनगरका मतदाताहरुमाझ झण्डै २० प्रतिशतले अग्रपंक्तिमा रहेका छन् । उपनगरहरुको मतले मुख्य शहर र ग्रामिण क्षेत्रका मतको तुलनामा राष्ट्रिय मतलाई बढी प्रतिबिम्बित गर्छ । उपनगरहरुमा बाइडेनको अवस्था विगतको चुनावमा हिलारीको भन्दा बलियो रहेको बताइन्छ । ४ बर्ष अगाडिको यस्तै सर्वेक्षणमा ट्रम्पले हिलारीलाई ४५ देखि ३५ प्रतिशत मार्जिनले उछिनेका थिए ।