न्युयोर्क सिटीमा कोरोनाबाट कसैको मृत्यु नभएको पहिलो दिन जुलाई ११, राज्यभर ५ को मृत्यु
प्रकाशित मिति : असार २८, २०७७ आईतबार
महामारी सुरु भएको ४ महिनापछि शनिबार न्युयोर्क सिटीले कसैको पनि मृत्यु नभएको पहिलो रिपोर्ट सार्वजनिक गरेको छ । न्युयोर्क सिटीले सार्वजनिक गरेको रिपोर्ट अनुशार जुलाई ११ मा कसैको पनि मृत्यु नभएको जनाइएको छ ।
न्युयोर्क सिटीमा पहिलोपटक मार्च ११ मा कोरोनाका कारण पहिलो मृत्यु दर्ता गरिएको थियो । त्यसयता हरेक दिन कोरोनाका महामारीका कारण मृत्यु हुनेहरुको संख्या बढ्दै अप्रिल महिनामा उच्चतम बिन्दुमा पुगेको थियो ।
मार्च ११ देखि न्युयोर्क सिटीमा कोरोनाबाट नमरेको दिन थिएन । तर जुलाई ११ मा कसैको मृत्यु नभएको रेकर्ड कायम भएको हो ।
अमेरिकाका विभिन्न राज्यहरुमा कोरोनाको महामारी नियन्त्रणबाहिर गइरहेको सन्दर्भमा न्युयोर्क सिटी भने उदाहरण बन्न सफल भएको छ । यद्यपी न्युयोर्क सिटीले पुन कोरोनाको महामारी बढेमा के गर्ने भन्नेबारे तयारी भने गरिरहेको छ ।
शनिबार न्युयोर्क राज्यमा कोरोना संक्रमणबाट ५ जनाको मात्र मृत्यु, संक्रमण दर कम र स्थीर
अमेरिकाको फ्लोरिडा लगायतका राज्यमा कोरोना संक्रमितको संख्यामा दैनिक नयाँ रेकर्ड कायम भइरहँदा न्युयोर्कमा भने कोरोना संक्रमणको दर कम र स्थीर रहेको छ । शनिबार न्युयोर्क राज्यभर कोरोना संक्रमणबाट ५ जनाको मृत्यु भएको गभर्नर एन्ड्रयु कुमोले जानकारी दिएका छन् ।
शनिबार न्युयोर्क राज्यभर ८ सय १ जना अस्पतालमा भर्ना भएका थिए । आज सार्वजनिक गरिएको तथ्यांक औषत तीनदिनको तथ्यांक हो, जसमा ज्यान गुमाउने र अस्पताल भर्ना हुनेहरुको संख्या कोरोनाको महामारी सुरु भएयताकै सबैभन्दा कम छ ।
गभर्नर कुमोले पछिल्लो तथ्यांक स्थीर र सबैभन्दा कम रहेपनि यसलाई बढ्न नदिने कुरा न्युयोर्कबासीहरुमा भरपर्ने बताएका छन् । सबै मिलेर कोरोनाबिरुद्ध लड्नसक्ने कुरा न्युयोर्कबासीहरुले पूरै अमेरिकालाई देखाएको कुमोले बताएका छन् ।
अमेरिकाका अधिकांश राज्यमा भने कोरोना संक्रमित र मृत्यु हुनेहरुको संख्या बढ्दो रहेको छ । अहिले न्युयोर्कमा अमेरिकाका विभिन्न १६ राज्यहरुबाट आउनेहरुलाई अनिवार्य क्यारेन्टीनको व्यवस्था गरिएको छ ।
न्युयोर्कबासीहरुले मास्क लगाएका कारण, सामाजिक दुरी कायम गरेका कारण, बारम्बार हात धोएका कारण र स्थानीय सरकारहरुले राज्यका निर्देशिकाहरु कार्यान्वयन गरेका कारण न्युयोर्कमा संक्रमण दर कम गर्न सम्भव भएको कुमोले जनाएका छन् ।
अहिले अमेरिकाको न्युयोर्क सिटी जुलाई ६ देखि तेश्रो चरणमा खुलिसकेको छ ।