महामारी सुरुभएयता ट्रम्पले लगाए पहिलोपटक मास्क
प्रकाशित मिति : असार २७, २०७७ शनिबार
![](https://i0.wp.com/www.khasokhas.com/wp-content/uploads/2020/07/Screen-Shot-2020-07-11-at-21.52.30.png?fit=702%2C362&ssl=1)
कोरोनाको महामारी सुरुभएयता अमेरिकी राष्ट्रपति डोनाल्ड ट्रम्पले पहिलोपटक मास्क लगाएका छन् । वासिंटनबाहिरको वाल्टर रिड सैन्य अस्पतालको भ्रमणका क्रममा ट्रम्पले मास्क लगाएका हुन् ।
अस्पतालमा ट्रम्पले घाइते सिपाहीहरु र स्वास्थ्यकर्मीहरुलाई भेटेका थिए । ट्रम्पले आफू मास्कको विपक्षमा कहिलेपनि नरहेको तर मास्क लगाउने उपयुक्त समय र स्थान भएको बताएका छन् ।
उनले राष्ट्रपतिका डेमोक्रेटिक उम्मेदवार जो बाइडेनलाई मास्क लगाएकोमा खिसी गर्दै आफूले मास्क नलगाउने बताएका थिए । ट्रम्पले मास्क नलगाएपछि अमेरिकामा कैयन ट्रम्प समर्थकहरु पनि मास्क नलगाई हिड्ने गरेका थिए ।
गत अप्रिलमा अमेरिकन सीडीसीले सार्वजनिक स्थलमा जाँदा मास्क अनिवार्य लगाउनुपर्ने वा अनिवार्य नाकमुख छोप्नुपर्ने निर्देशिका जारी गर्दा ट्रम्पले उक्त निर्देशिकाको पालना नगर्ने बताएका थिए । तर ट्रम्पलाई बारम्बार मास्क लगाउन आग्रह गरिदै आएको थियो ।