पहिले कामबाट पाएको भन्दा धेरै बेरोजगारी विमा रकम नदिने नीतिका पक्षमा ट्रम्प प्रशासन
प्रकाशित मिति : असार २६, २०७७ शुक्रबार
बेरोजगारी विमा रकममा आवेदकलाई पहिलेको आम्दानीभन्दा धेरै रकम नदिने नीतिका पक्षमा ट्रम्प प्रशासन रहेको ट्रेजरी सेक्रेटरी स्टेभेन मन्चिनले बताएका छन् । उनले कोरोना राहतको अर्को प्याकेजमा बेरोजगारी राहत लिनेहरुलाई काम गरेको बेलामा गरेको आम्दानीभन्दा बढी रकम नदिनेगरी सिमा तोक्न चाहेको बताएका छन् ।
कोरोनाको महामारीपछि काम गुमाएकाहरुले बेरोजगारी विमा वा महामारी बेरोजगारी सहायताका अतिरिक्त साप्ताहिक ६ सय डलर समेत पाइरकेका छन् । बेरोजगारी विमाका अतिरिक्त साप्ताहिक ६ सय प्राप्त गर्दा कामबाट आउने भन्दा बढी रकम आएकाले कामदारहरु काममा फर्कन अनिच्छुक देखिएका छन् ।
मन्चिनले कामबाट पाउने शतप्रतिशत रकम भन्दा बढी रकम अब बेरोजगारी विमाबाट नदिइने बताएका छन् । डेमोक्र्याट्सहरुले हाउसबाट अतिरिक्त साप्ताहिक ६ सय डलर दिने राहतलाई डिसेम्बरसम्म लम्बाउन बिल पारित गरेपनि यो बिल सिनेटबाट पारित हुन सकेको छैन ।
अर्को राहत प्याकेज जुलाई २० देखि अन्तिमभित्रका पारित गर्ने योजना रहेको छ । सिनेटमा रिपब्लिकन नेता मिच म्याक्कोनेलसँग यसबारे आफूले छलफल गरिसकेको समेत मन्चिनले बताएका छन् । ट्रम्प प्रशासनले अमेरिकनहरुलाई अर्को चरणको बैंक डिपोजिट राहत प्रदान गर्न चाहेको उनले बताएका छन् ।
आफूहरुले अर्को चरणको डाइरेक्ट डिपोजिट राहतलाई समर्थन गर्ने उनले बताएका छन् । तर अर्को चरणको राहत पदान गर्दा त्यसका मापदण्डहरु निर्धारण हुनुपर्ने उनको भनाई छ । बार्षिक ४० हजारभन्दा कम आम्दानी हुनेलाईमात्र अर्को चरणको राहत उपलब्ध गराउनेबारे छलफल भइरहेको छ ।
अतिरिक्त साप्ताहिक ६ सय डलरको सुविधा यस महिनाको अन्त्यमा समाप्त हुँदैछ ।