संक्रमित १ लाख ८० हजार नाघेपछि टेक्सासमा मास्क अनिवार्य, नलगाउनेलाई २५० डलर जरिवाना
प्रकाशित मिति : असार १८, २०७७ बिहीबार
संक्रमितको संख्या १ लाख ८० हजार नाघेपछि टेक्सासका गभर्नर ग्रेग एबोटले राज्यभर सार्वजनिक स्थलमा मास्क अनिवार्य गरेका छन् । टेक्सासका गभर्नर एबोटको कोरोनाको महामारीका बीचमा राज्य खुला गर्नका लागि कदम चाल्ने पहिलो गभर्नर थिए ।
२० वा त्योभन्दा धेरै संक्रमित संख्या भएको काउन्टीमा सार्वजनिक स्थलमा मास्क अनिवार्यरुपमा लगाउन गभर्नरले विहिबार आदेश दिएका हुन् । आदेश सेन्ट्रल टाइम अनुशार शुक्रबार दिउसो १२ बजेपछि लागु हुने जनाइएको छ ।
१० बर्षभन्दा कम उमेरकाहरु र स्वास्थ्य समस्याका कारण मास्क लगाउन नसक्नेहरुलाई भने मास्क अनिवार्य गरिएको छैन । मास्क नलगाउनेहरुलाई मौखिक वा लिखित चेतावनी दिनुका साथै २५० डलरसम्म जरिवाना हुने भएको छ ।
विहिबारमात्र टेक्सासले थप ७ हजार ९ सय १५ संक्रमितको संख्या रिपोर्ट गरेको छ भने टेक्सास अमेरिकामा सबैभन्दा बढी संक्रमित हुने तेश्रो राज्यमा परेको छ । पहिलोमा न्युयोर्क र दोश्रोमा क्यालिफोर्निया रहेका छन् । टेक्सासले न्युजर्सीलाई उछिनिसकेको छ ।
अमेरिकामा कोरोना संक्रमण पुष्टी हुनेहरुको संख्या बढ्दै गएपछि कम्तीमा २३ वटा राज्यले पुन खोल्ने योजनालाई अहिलेका लागि स्थगित गरेका छन् । अमेरिकामा बुधबार एकैदिनमा ५० हजार ६ सय ५५ संक्रमित थपिएका थिए । विहिबार फ्लोरिडालेमात्र १० हजार १०९ नयाँ संक्रमित रिपोर्ट गरेको छ ।
अमेरिकामा न्युयोर्क र क्यालिफोर्नियापछि नेपालीहरुको बाक्लो बसोबास भएको राज्य टेक्सास हो । अमेरिकामा सबैभन्दा धेरै नेपाली विद्यार्थीहरु पनि टेक्सासमा नै रहेका छन् ।