भारतमा टिकटक र वीच्याट लगायत झण्डै ६० चाइनिज एपमा प्रतिबन्ध
प्रकाशित मिति : असार १५, २०७७ सोमबार
यसैमहिनाको सुरुतिर चीन र भारतको सैन्य भीडन्तपछि ‘जस्तालाई त्यस्तै’ वदलाका साथ टिकटक र वीच्याट सहित झण्डै ६० चाइनिज एप्लीकेशनहरुलाई भारतमा प्रतिबन्ध लगाइएको छ । भारतीय सरकारले राष्ट्रिय सुरक्षा चासो देखाउँदै यी एपहरु भारतमा खुल्नमा प्रतिबन्ध लगाएको हो ।
लद्दाख भिडन्तमा २० भारतीय सैनिकको ज्यान गएको थियो । उक्त भीडन्तमा मारिने चाइनिज सेनाको संख्या भने गोप्य राखिएको थियो । चिनियाँ एप्सले देशको सम्प्रभुता र अखण्डतामा खतरा पुर्याएको भन्दै प्रयोगमा रोक लगाइएको भारतको आइटी मन्त्रालयले जनाएको छ ।
भारतमा पब्जी, शेयरइट, बाइदु म्याप लगायतका एप्लीकेशनहरुमा पनि प्रतिबन्ध लगाइएको छ । टिकटकमा झण्डै २२ करोड भारतीय प्रयोगकर्ता रहेका छन् भने पब्जीका ५ करोड भारतीय प्रयोगकर्ता रहेका छन् । टिकटकका सम्पूर्ण प्रयोगकर्ताहरुमध्ये एकतिहाई भारतमा छन् ।
अमेरिकाको मासाचुसेट्समा रहेको साइबर सेक्युरिटी कम्पनीका प्रमुख कार्यकारीले चाइनिज एपबाट प्रयोगकर्ताका डाटाहरु चोरी भएको भारतीय आरोप निराधार नभएको बताएका छन् । सरकारले ती एपहरु नचलाएपनि ती कम्पनीहरुले बेलाबखतमा सरकारसँग डाटा शेयर गर्ने सहमति जनाएको हुनसक्ने उक्त साइबर सेक्युरिटी कम्पनीका प्रमुखको भनाई छ ।