वासिंटन डिसीलाई अमेरिकाको ५१ औं राज्य बनाउने र नाम फेर्ने प्रस्ताव प्रतिनिधिसभाबाट पारित
प्रकाशित मिति : असार १२, २०७७ शुक्रबार
वासिंटन डिसीलाई अमेरिकाको ५१ औं राज्य बनाउने बिल अमेरिकाको तल्लो सदन प्रतिनिधिसभाबाट पारित भएको छ । डेमोक्र्याट्सहरुले पारित गरेको यो बिलमा रिपब्लिकनहरुको असहमति भएकाले सिनेटबाट पारित हुने सम्भावना भने निकै कम रहेको छ ।
प्रतिनिधिसभामा २३२ जनाले बिलका पक्षमा र १८० जनाले विपक्षमा मतदान गरेका छन् । विलमा वासिंटन डिसीको नाम परिवर्तन गरेर स्टेट अफ वासिंटन, डगलस कमनवेल्थ बनाउने प्रस्ताव गरिएको छ ।
वासिंटन डिसीको जनसंख्या झण्डै ७ लाख रहेको र भर्मोन्ट वा वायोमिंगको भन्दा पनि धेरै रहेको भन्दै छुट्टै राज्य बनाउने तर्क गरिएको हो । वासिंटन डिसीले २२ वटा राज्यले भन्दा धेरै कर तिर्ने गरेको जनाइएको छ ।
अमेरिकाको राजधानी वासिंटन डिसीलाई ५१ औं राज्य बनाउने प्रस्तावको राष्ट्रपति डोनाल्ड ट्रम्पले पनि आलोचना गरेका छन् । डेमोक्रेटिक बाहुल्य रहेको वासिंटन डिसीलाई ५१ औं राज्य बनाएर तीब्र प्रतिस्पर्धा रहेको सिनेटमा २ सिट डेमोक्र्याट्सलाई दिने पक्षमा रिपब्लिकनहरु देखिन्नन् ।
राष्ट्रपति ट्रम्पले वासिंटन डिसी कहिलेपनि राज्य नहुने बताएका थिए । अरु दुईजना डेमोक्रेटिक सिनेटर र ५ जना डेमोक्रेटिक प्रतिनिधिसभा सदस्य बढाउन डिसीलाई अर्को राज्य बनाउन दिन नहुने ट्रम्पले बताएका थिए ।