दोश्रो चरणमा राहत चेक पठाउनेबारे ट्रम्पले गरे मार्गप्रसस्त, निकै उदार प्याकेज ल्याउने दावी
प्रकाशित मिति : असार ८, २०७७ सोमबार
अमेरिकी राष्ट्रपति डोनाल्ड ट्रम्पले दोश्रो चरणको राहत चेकबारे आफूहरु सकारात्मक रहेको प्रतिकृया दिएका छन् । के तपाई अमेरिकनहरुलाई दोश्रो चरणको राहत चेक पठाउँदै हुनुहुन्छ भन्ने प्रश्नमा ट्रम्पले भने हो, हामी गर्दैछौं । हामी अर्को राहत प्याकेज गर्दैछौं । यो असाध्यै राम्रो र उदार खालको हुनेछ ।
कति रकम पठाइनेछ भन्ने प्रश्नको जवाफमा उनले यसबारे आफूहरुले छिट्टै निर्धारण गर्ने बताएका छन् । ह्वाइट हाउसका अधिकारीहरुले दोश्रो चरणको राहत चेकबारे कुनै निर्णय नभएको बताएका छन् । ट्रम्पले पनि दोश्रो चरणको राहत पहिलो चरणको जस्तै बैंकमा डाइरेक्ट डिपोजिट हुने नहुने केही बताएका छैनन् ।
ट्रम्पले अर्को राहत प्याकेजका लागि दुईदलीय सहमतिको बिल आउन लागेको संकेत भने गरेका छन् । उक्त बिलमा राहत चेक समावेश गरिन्छ वा अन्य प्रकारको राहत उपलब्ध गराइनेछ भन्नेबारे पनि केही स्पष्ट छैन ।
गत महिना डेमोक्र्याट्सहरुले ३ ट्रिलियन डलरको हिरोज एक्ट हाउसबाट पारित गरेका छन् । तर यो दुईदलीय बिल नभएका कारण सिनेटबाट पारित हुने सम्भावना निकै कम रहेको छ ।