जोन्सन एण्ड जोन्सनले छालामा गोरोपन ल्याउने क्रिमको उत्पादन बन्द गर्ने
प्रकाशित मिति : असार ६, २०७७ शनिबार
हेल्थकेयर सामाग्रीहरु उत्पादन गर्दै आएको कम्पनी जोन्सन एण्ड जोन्सनले छालामा गोरोपन ल्याउने क्रिम उत्पादन रोक्ने भएको छ । विश्वब्यापी रुपमा रंगभेदको बहस भइरहँदा कम्पनीले मध्यपूर्व र एसियामा निकै लोकप्रिय रहेको यो उत्पादन रोक्ने भएको हो ।
खासगरी छालामा गोरोपन ल्याउने जोन्सन एण्ड जोन्सनको क्लीन एण्ड क्लीयर फेयरनेस लाइन क्रिम भारतमा सबैभन्दा धेरै बेचिदै आएको छ । त्यस्तै नेपालमा समेत यो क्रिम प्रयोग गरिदै आएको छ ।
जोन्सन एण्ड जोन्सनले भनेको छ – ‘केही उत्पादनका नाम र धब्बाहरु हटाउने उत्पादनमा आफ्नो प्राकृतिक छालाको रंगको तुलनामा गोरोपन राम्रो हुने दावी गरिएको भन्दै बहसहरु भइरहेका छन् । हाम्रो त्यस्तो आशय कहिले पनि थिएन । स्वस्थ्य छाला नै राम्रो छाला हो ।’
कम्पनीले ती उत्पादनहरु बन्द गर्ने र निर्यात नगर्ने बताएको छ । तर बजारमा पहिले नै रहेको उत्पादन भने नसकिंदासम्म किन्न सकिने भएको छ ।
युनिलिभर, प्रोक्टेर एण्ड ग्याम्बल र लोरियल लगायतका कैयन कम्पनीहरुले छालामा गोरोपन ल्याउने दावीसहित उत्पादनहरु बेच्दै आएका छन् । उनीहरुले फेयर एण्ड लभ्ली, ओले र गानियर क्रिम बेच्दै आएका छन् । उनीहरुले भने ती उत्पादनबारे केही बताएका छैनन् ।
गतबर्षमात्र विश्वमा ६ हजार २ सय ७७ टन गोरोपन ल्याउने क्रिमहरु बिक्रि भएका थिए । जसमा बुढोपन नदेखिने, काला धब्बाहरु हटाउने लगायतका क्रिमहरु समेत रहेका छन् ।