मास्क नलगाउनेहरुलाई अमेरिकामा विमान चढ्न प्रतिबन्ध
प्रकाशित मिति : असार ३, २०७७ बुधबार
अमेरिकाका तीन एयरलाइन्सहरु युनाइटेड, अमेरिकन र डेल्टाले मास्कको प्रयोग नगर्ने यात्रुहरुलाई विमान चढ्न प्रतिबन्ध लगाउने चेतावनी दिएका छन् । विमानमा मास्क अनिवार्य नगरिएकोबारे गुनासाहरु आएपछि ती एयरलाइन्सहरुले मास्क अनिवार्य गरेका हुन् ।
मे ११ देखि अमेरिकामा मुख्य एयरलाइन्सहरुले यात्रु र कर्मचारीहरुलाई विमानमा यात्रा गर्दा मास्क लगाउन वा अनुहार छोप्न आग्रह गर्दै आफ्नो नीतिमा परिवर्तन गरेका थिए । बालबालिकाहरु र स्वास्थ्य समस्या भएकाहरुमा भने मास्क अनिवार्य गरिएको थिएन । तर सबैले यो नियम पालना नगरेपनि एयरलाइन्सहरुले यात्रामै प्रतिबन्ध लगाउने चेतावनी दिएका हुन् ।
डाक्टर माइकल एन्डरसनले जुन ६ मा युनाइटेड एयरलाइन्सबाट डेनभर जाने क्रममा कम्तीमा तीनजनाले मास्क नलगाएको देखेको बताएका छन् । त्यस्तै अर्का एकजना यात्रुले पनि अमेरिकन एयरलाइन्समा मायामीबाट टेक्सास आउने क्रममा उनको अगाडि बसेका दुईजनाले मास्क नलगाएको देखेकी थिइन् ।
युनाइटेड एयरलाइन्सले आफ्ना कर्मचारीलाई जारी गरेको एउटा सर्कुलरमा यदि कोही यात्रुले मास्क नलगाएको पाइएमा अनिवार्य रुपमा मास्कको प्रयोग गर्न सचेत गराउनुपर्ने उल्लेख छ । यदि यात्रुलाई मास्कको आवश्यकता भएमा मास्क समेत प्रदान गर्न भनिएको छ ।
यदि यात्रुले सचेत गराउँदा पनि नमानेको खण्डमा मास्कसम्बन्धि नीति स्मरण गराउने कार्ड प्रदान गर्न र त्यती गर्दा पनि नमानेमा कर्मचारीले त्यस्ता यात्रुबिरुद्ध रिपोर्ट फाइल गर्न आन्तरिक निर्देशन जारी गरिएको छ । त्यसपछि उक्त घटनाको औपचारिक अनुसन्धान गरेर त्यस्ता यात्रुलाई भविश्यमा उक्त एयरलाइन्सको विमान चढ्न प्रतिबन्ध समेत लगाइन सक्नेछ ।
अमेरिकन एयरलाइन्सले गेटमा नै मास्क अनिवार्य गरिएको र मास्क नलगाउनेहरुलाई भित्र पस्न नदिइने गरेको जनाएको छ । मास्क लगाउन नमान्नेलाई भविश्यमा विमान चढ्न नै प्रतिबन्ध लाग्नसक्ने उक्त एयरलाइन्सले जनाएको छ । त्यस्ता डेल्टा एयरलाइन्सले पनि मास्क नीति लागु नगर्ने यात्रुलाई भविश्यमा आफ्नो एयरलाइन्समा नचढाउने चेतावनी दिएको छ ।