ट्रम्पले खाएको भनिएको औषधी अमेरिकामा कोरोना संक्रमितको उपचारमा प्रयोग गर्न रोक
प्रकाशित मिति : असार १, २०७७ सोमबार
अन्तत: खाद्य तथा औषधी प्रशासन एफडीएले कोभिड १९ का बिरामीको उपचारका लागि मलेरियाको औषधी हाइड्रोक्सीक्लोरोक्वीनको आपतकालिन प्रयोगमा रोक लगाएको छ । यो औषधीको अमेरिकी राष्ट्रपति डोनाल्ड ट्रम्पले बारम्बार प्रचार गरेका थिए भने आफूले समेत यो औषधीको प्रयोग गरेको बताएका थिए ।
यो औषधी कोरोनाबिरुद्ध आपतकालिन प्रयोगका लागि मापदण्ड पूरा नगरेको एफडीएले ठहर गरेको छ । नयाँ सुचना र अन्य सुचनाको आधारमा यो औषधी कोरोना संक्रमितको उपचारमा प्रयोग उपयुक्त नभएको निष्कर्ष निकालेको एफडीएले जनाएको छ ।
यो औषधीको प्रयोगबाट कोरोना संक्रमितमा अन्य कैयन साइड इफेक्टहरु देखिएको जनाइएको छ । साथै औषधीको प्रयोगबाट मुटुको गति अनियमित हुने लगायतका समस्याहरु देखिने गरेको जनाइएको छ ।
यसअगाडि यो औषधीको प्रयोगको आपतकालिन प्रयोगको स्वीकृति प्रदान गरिएको थियो । तर आजैका मितिदेखि अमेरिकामा कोरोनाका सक्रमितको उपचारमा यो औषधीको आपतकालिन प्रयोगको स्वीकृति खारेज गरिएको छ ।
त्यस्तै एफडीएले रेम्डेसिभिर नामको औषधी प्रयोग गरिरहेका बिरामीलाई हाइड्रोक्सीक्लोरोक्वीन नदिन समेत चेतावनी दिएको छ । रेम्डेसिभिर नामको औषधी कोरोना संक्रमित बिरामीको छिटो उपचार गर्नमा लाभदायी प्रमाणित भएको छ । तर दुईवटा औषधीको मिसावट गर्दा प्रभावकारिता घट्ने एफडीएले जनाएको छ ।