मंगलबार कार्यकारी आदेश जारी गर्दै राष्ट्रपति ट्रम्प
प्रकाशित मिति : असार १, २०७७ सोमबार
अमेरिकी राष्ट्रपति डोनाल्ड ट्रम्पले मंगलबार प्रहरीको दुब्र्यबहारलाई सम्बोधन गर्दै एक कार्यकारी आदेश जारी गर्ने भएका छन् । शक्ति प्रयोगको उपयुक्त अभ्यासबारे र खराब प्रहरी अधिकारीलाई ट्रयाक गर्ने कार्यक्रमबारे कार्यकारी आदेश जारी गर्न लागिएको हो ।
प्रहरीको शक्ति प्रयोग र विभेदबिरुद्ध लगातार प्रदर्शनहरुपछि राष्ट्रपति ट्रम्पलाई यसबारे कदम चाल्न दवाव श्रृजना भएको छ । आफूले राम्रो समाधानका लागि कदम चाल्न लागेको राष्ट्रपति ट्रम्पले बताएका छन् ।
आफ्नो लक्ष्य केबल कानुनी व्यवस्था कायम गर्नु रहेको बताउँदै ट्रम्पले न्याय र सुरक्षाका पक्षमा कदम चाल्ने बताएका छन् । सर्वसाधारण र प्रहरी अधिकारीको सुरक्षामा सन्तुलन कायम गर्नका लागि अर्थपूर्ण र दीर्घकालिन सुधारको खाँचो रहेको अवस्थमा ट्रम्पको आदेश आउन लागेको हो ।
आधुनिक शक्तिको प्रयोग गर्नका लागि कार्यकारी आदेशले प्रहरीलाई आव्हान गर्नेछ । प्रहरी विभागहरुलाई पनि खराब प्रहरी अधिकारीका बारेमा ट्रयाक गर्न र सरुवा हुँदा त्यसबारे अर्को विभागलाई पनि जानकारी दिन समेत प्रोत्साहन गरिनेछ ।
ट्रम्पले प्रहरी विभागलाई दिदै आएको बजेट रोक्का नगर्ने बताएका छन् । प्रहरीहरु राम्रोसँग तालिमप्राप्त रहेको सुनिश्चित गर्न आफूहरुले फरक बाटो अपनाउने ट्रम्पको भनाई छ ।
संसदमा डेमोक्र्याट्सहरुले प्रहरीबाट हुने घाँटी थिचाईमा प्रतिबन्ध लगाउन र अरु कैयन नीतिमा परिवर्तनका लागि बिल प्रस्ताव गरेका छन् । रिपब्लिकन सांसदहरुको यसबारे छुट्टै प्याकेज रहेको छ ।