पोलियो थोपाले कोरोना संक्रमणबाट जोगाउनसक्ने अमेरिकी विज्ञहरुको दावी
प्रकाशित मिति : जेष्ठ ३०, २०७७ शुक्रबार
विश्वमा कोरोनाबिरुद्धका खोप उत्पादनका लागि तीब्र गतिमा काम भइरहँदा केही बरिष्ठ विज्ञहरुले पोलियोबिरुद्धको खोपले कोरोना संक्रमणबाट जोगाउनसक्ने बताएका छन् । ५ जनाको बरिष्ठ विज्ञहरुको टिमले साइन्स म्यागाजिनमा प्रकाशित गरेको रिपोर्ट अनुशार पोलियोबिरुद्धको खोपले कोराना संक्रमणबाट जोगाउनसक्ने कैयन प्रमाणहरु रहेका छन् ।
साइन्स म्यागाजिनमा प्रकाशित रिपोर्ट यहाँ पढ्नुहोला ।
मुखबाट दिइने पोलियो थोपा सुरक्षित, सस्तो र ब्यापक रुपमा उपलब्ध रहेको छ । एक बिलियन भन्दा धेरै डोजहरु उत्पादन भइसकेको पोलियो थोपा बार्षिक रुपमा १४० भन्दा धेरै देशहरुमा प्रयोग गरिदै आएको छ । उक्त खोपले विश्वब्यापी रुपमा पोलियो लगभग उन्मुलन गरिसकेको छ ।
मुखबाट दिइने पोलियो थोपाले कमजोर प्रकारको पोलियो भाइरसको प्रयोग गर्छ । उक्त जीवित खोपले लामोसमय चल्ने इम्युन प्रतिकृया पैदा गर्छ । विज्ञहरुले पोलियोबिरुद्धको खोप कोरोनाभाइरसबिरुद्ध प्रयोग गरेर हेर्न सुझाव समेत दिएका छन् ।
एफडीएका कोन्स्टान्टिन चुमाकोभ र युनिभर्सिटी अफ मेरिल्याण्ड स्कुल अफ मेडिसिनको ह्युमन भाइरोलोजी इन्स्टीच्युटका डाक्टर रोबर्ट गालोले अन्य साथीहरुसँग मिलेर उक्त रिपोर्ट लेखेका हुन् । गालो एड्सको कारक भाइरस एचआईभी पत्ता लगाउने व्यक्ति हुन् भने चुमाकोभ एफडीएमा भ्याक्सिन डिभिजनमा शोभसम्बन्धि एसोसिएट डाइरेक्टर हुन् ।
उनीहरुले कोरोनाबिरुद्ध पोलियो खोप ओपीभीको प्रयोग गर्न प्रस्ताव गरेका छन् । कोरोनाभाइरस र पोलियो भाइरस एउटै प्रकृतिका भाइरस रहेको तथा उनीहरु एउटै प्रकारको इम्युनिटी मेकानिज्मबाट परास्त हुनसक्ने उनीहरुले बताएका छन् । उनीहरुले मुखबाट दिइने पोलियो थोपाले अस्थायी रुपमा भएपनि कोरोनाको संक्रमणबाट जोगाउन सक्ने बताएका छन् ।
मुखबाट दिइने पोलियो खोप अमेरिकामा उपलब्ध हुन छाडिसकेको छ । तर यो अहिले पनि विश्वका विभिन्न देशहरुमा प्रयोग गरिदै आएको छ ।
विश्वभरिबाट टाइप टु नामक पोलियो भाइरस उन्मूलन भएको तीन वर्षअघि घोषणा गरिएको थियो भने विश्व स्वास्थ्य सङ्गठनका अनुसार टाइप थ्री नामक भाइरसको उन्मूलन गतबर्ष भएको घोषणा गरिएको थियो ।
तर टाइप वान नामक भाइरस चाहिँ अफगानिस्तान र पाकिस्तानमा अझै देखिएको जनाइएको छ । नेपाललाई भने झण्डै ६ बर्ष अगाडि नै पोलियोमुक्त देश घोषणा गरिएको थियो । नेपाल सरकारले प्रत्येक वर्ष छ लाख बालबालिकालाई पोलियोको खोप खुवाउने गरेको छ ।