न्युयोर्कमा प्रहरीले पक्राउ गर्दा घाँटी थिच्न नपाउने बिल पारित
प्रकाशित मिति : जेष्ठ २६, २०७७ सोमबार
न्युयोर्क राज्यका सांसदहरुले कोही व्यक्तिलाई पक्राउ गर्ने क्रममा प्रहरीबाट घाँटी थिच्न नपाइने बिल पारित गरेका छन् । एरिक गार्नर घाँटिथिचाईबिरुद्धको ऐन नाम दिइएको उक्त बिल सोमबार पारित भएको हो ।
यदि कोही प्रहरीले कसैको घाँटी थिचेर घाइते बनाएमा वा मृत्यु भएमा ती प्रहरीबिरुद्ध अभियोग लगाउने व्यवस्था बिलमा गरिएको छ । सन् २०१४ मा न्युयोर्कमा प्रहरीले पक्राउ गर्ने क्रममा घाँटी थिच्दा एरिक गार्नरको मृत्यु भएको थियो ।
न्युयोर्क सिटी प्रहरीले घाँटी थिच्नमा पहिले नै प्रतिबन्ध लगाइसकेको छ । तर पारित बिलले यसलाई कानुनी रुपमा नै बर्जित गरेको छ । गभर्नर कुमोले उक्त बिलमा हस्ताक्षर गर्ने बताइसकेका छन् ।
यो बिल गार्नरको मृत्यु लगत्तै सन् २०१४ मा नै पेश गरिएको थियो । तर गतबर्षसम्म न्युयोर्क राज्यको सिनेटमा रिपब्लिकनको पकड रहेकाले बिल यत्तिकै रहेको थियो । अहिले भने जर्ज फ्लोयडको मृत्युपछि यो बिलले सबैको ध्यानाकर्षण गरेको थियो ।
गार्नरको घाँटी थिचेका प्रहरी अधिकारीलाई गतबर्षमात्रै निष्काशन गरिएको थियो । स्टेटन आइल्याण्ड डिस्ट्रिक्ट एटोर्नी र जस्टिस डिपार्टमेन्टले ती प्रहरी अधिकारीबिरुद्ध अपराधको मुद्दा लगाउन अस्वीकार गरेका थिए ।