आजदेखि न्युयोर्क सिटी पहिलो चरणमा खुल्न सुरु, ४ चरणमा खोलिने
प्रकाशित मिति : जेष्ठ २६, २०७७ सोमबार
कोरोनाको महामारीका कारण बन्द भएको न्युयोर्क सिटी आजदेखि पहिलो चरणमा खुल्न सुरु भएको छ । मार्चको तेश्रो सातादेखि बन्द रहेको न्युयोर्क सिटी सोमबारदेखि पहिलो चरणमा खुल्न सुरु भएको हो ।
न्युयोर्कका गभर्नर एन्ड्रयु कुमोले यो न्युयोर्क सिटीका लागि ठूलो दिन भएको बताएका छन् । न्युयोर्क सिटी सबै स्वास्थ्य मापदण्डहरु पूरा गरेका कारण सोमबारदेखि पहिलो चरणमा खुल्न सुरु भएको हो ।
शनिबार न्युयोर्क सिटीमा नयाँ संक्रमण पुष्टी हुनेको संख्या मार्च १६ यताकै सबैभन्दा कम रहेको थियो । त्यसैगरी आईसीयु, अस्पतालका साधारण बेड, कोरोना भाइरस परीक्षण लगायतका अन्य मापदण्डहरु पनि न्युयोर्क सिटीले पूरा गरेको छ ।
न्युयोर्क सिटीका ट्रेनमा चढ्दा मास्क अनिवार्य गरिएको छ भने स्टेशनहरुमा सेनिटाइजर राखिएको छ । मास्क नहुनेहरुलाई मास्क समेत वितरण गरिएको छ ।
दोश्रो चरणमा खोल्ने सन्दर्भमा सावधानी अपनाइरहेको न्युयोर्कका मेयर बिल ब्लाजिओले बताएका छन् । रेष्टुरेण्ट र बारहरुमा बाहिर बस्ने व्यवस्था गर्न अनुमति दिइएको छ भने शैलुनहरु ५० प्रतिशत क्षमतामा खुल्ने भएका छन् ।
दोश्रो चरणमा न्युयोर्क खोल्न जुनको २२ तिर सुरु गर्न सकिने जनाइएको छ । तर जुलाईको सुरुदेखि दोश्रो चरणमा खोल्न सुरु गर्ने लक्ष्य लिइएको छ ।
लङ आइल्याण्ड बुधबारदेखि दोश्रो चरणमा खुल्न सुरु गर्नेछ । हडशन उपत्यका भने मंगलबारदेखि तेश्रो चरणमा खुल्न सुरु गर्नेछ । तेश्रो चरणमा खुलेपछि रेष्टुरेण्टभित्र खानाखान सकिनेछ ।
चौथो चरणमा विद्यालयहरु, म्युजियमहरु र सिनेमाघरहरु पनि खुल्नेछन् । यो कहिलेदेखि खुल्ने भन्नेकुरा संक्रमण, अस्पताल भर्ना हुने दर र मृत्यु दरमा भर पर्नेछ ।