अर्को राहत प्याकेजमा एक ट्रिलियन डलर खर्चने ह्वाइटहाउसको योजना
प्रकाशित मिति : जेष्ठ २२, २०७७ बिहीबार
अमेरिकामा कोरोनाको महामारीबाट उत्पन्न आर्थिक संकटको सामना गर्न ह्वाइट हाउसले एक ट्रिलियन डलरको राहत ल्याउने योजना बनाइरहेको छ । राष्ट्रपति डोनाल्ड ट्रम्पले आफ्नो आर्थिक टिमसँग भेटेर यसबारे छलफल गरेका छन् ।
अहिलेसम्म कुनै नीतिगत मापदण्ड भने तय भइसकेको छैन । तर सिनेटमा रिपब्लिकन नेता मिच म्याक्कोनेलले अर्को राहत प्याकेज १ ट्रिलियनको हाराहारीमा हुने बताएको विभिन्न संचारमाध्यमहरुले जनाएका छन् ।
जुलाईको तेश्रो साताभन्दा अगाडि भने कुनै पनि राहत पारित हुने सम्भावना नरहेको मिच म्याक्कोनेलले जनाएका छन् । जुलाई ३ बाट सिनेटको दुईहप्ते विदा हुने भएकाले सिनेटरहरु जुलाई २० भन्दा अगाडि राजधानी फर्कने कुनै योजना छैन । त्यसैले उक्त मिति अगाडि कुनै राहत पारित हुने सम्भावना कम छ ।
अहिलेसम्म अमेरिकी संसदले राहतसम्बन्धि ४ वटा बिलहरु पारित गरिसकेको छ । जसको कुल राशी झण्डै ३ ट्रिलियन डलर रहेको छ ।
ह्वाइट हाउसले बेरोजगारी विमा सुविधामा सुधारबारे पनि सोंचविचार गरेको जनाइएको छ । केही रिपब्लिकन सांसदहरुले काममा फर्कनेलाई साप्ताहिक ४५० डलर दिनेदेखि एकमुष्ठ १२ सय डलर दिनेसम्मका प्रस्तावहरु ल्याएका छन् ।