पीपीपी ऋण २४ हप्ताभित्र ६० प्रतिशत तलबमा लगाए मिनाहा हुने बिल दुबै सदनबाट पारित
प्रकाशित मिति : जेष्ठ २२, २०७७ बिहीबार
अमेरिकामा कोरोनाको महामारीमा कारण आर्थिक मारमा परेका व्यवसायहरुले प्राप्त गरेको पेचेक प्रोटेक्सन प्रोग्राम अन्तरगतको रकम ८ हप्ताको साटो २४ हप्ताभित्र प्रयोग गर्नसक्ने बिल संसदको दुबै सदनबाट पारित भएको छ । बिलले प्रदान गरेको यो लचतकताबाट तत्काल कामदार फिर्ता बोलाउन नसक्ने र खोल्न नसक्ने ब्यापारहरुलाई राहत पुग्नेछ ।
बिलले कतिसमयभित्र रकम खर्च गरेमा र के प्रयोजनका लागि खर्च गरेमा उक्त ऋण मिनाहा हुने भन्नेबारे थप लचकताको व्यवस्था गरेको छ । बिलले तलबमा ७५ प्रतिशत रकम खर्च गरेमा ऋण मिनाहा हुने प्रावधानमा लचकता अपनाएर ६० प्रतिशत रकम तलबमा खर्च गरेमा ऋण मिनाहा हुने व्यवस्था गरेको छ ।
अरु ४० प्रतिशत रकम मोर्गेज ब्याज, युटिलिटी र भाडामा प्रयोग गर्न सकिनेछ । यो बिलले गरेको व्यवस्थाले पीपीपी ऋण साना ब्यापारका लागि अझ प्रभावकारी हुने अपेक्षा गरिएको छ ।
गत साता प्रतिनिधिसभाबाट भारी बहुमतका साथ पारित यो बिल बुधबार राती सिनेटबापनि पारित भएको हो । अमेरिकी राष्ट्रपति डोनाल्ड ट्रम्पले हस्ताक्षर गरेपछि यो बिल कार्यान्वयनमा आउनेछ ।