अश्वेत अमेरिकन जर्ज फ्लोयडको मृत्युमा संलग्न चारैजना प्रहरीबिरुद्ध हत्या अभियोग दायर
प्रकाशित मिति : जेष्ठ २१, २०७७ बुधबार
अश्वेत अमेरिकन जर्ज फ्लोयडको मृत्युमा संलग्न मिनेपोलिसका चारैजना प्रहरीबिरुद्ध अभियोग दायर गरिएको छ । उनैहरु चारैजनालाई निलम्बन गरेर हत्याको अभियोग दायर गरिएको छ ।
जर्ज फ्लोयडको घाँटीमा घुँडा धँस्नेबिरुद्ध सेकेण्ड डिग्री हत्याको अभियोग दायर गरिएको छ भने अरु तीनजनाबिरुद्ध सहयोग र दुरुत्साहनको अभियोग दायर गरिएको छ । जर्ज फ्लोडयको मृत्यु भएको एकसातापछि अरु जनाबिरुद्ध पनि मुद्दा दायर गरिएको हो ।
अघिल्लो सोमबार बेलुका ग्रोसरी स्टोरबाट पक्राउ गर्ने क्रममा बेहोस भएका जर्ज फ्लोयडको प्रहरी हिराशतमा मृत्यु भएको थियो । सामान किनेर नक्कली नोट दिएको अभियोगमा उनलाई पक्राउ गर्ने क्रममा प्रहरी अधिकारीले उनको घाँटीमा घुँडा धँसेका थिए ।
त्यसपछि अमेरिकाभर त्यसको विरोधमा प्रदर्शनहरु भएका छन् । कतिपय ठाउँमा त्यस्ता प्रदर्शनहरु हिश्रंक बनेका छन् भने लुटपाटमा समेत परिणत भएका छन् ।
डेरेक चाउभिन नामका प्रहरीले जर्जको घाँटीमा झण्डै ९ मिनेट घुँडा धँसेका थिए । उनलाई यसअगाडि नै उनीबिरुद्ध थर्ड डिग्री हत्या र सेकेण्ड डिग्री नरसंहारको मुद्दा चलाइएको छ । सेकेण्ड डिग्री हत्यामा संलग्न भएको प्रमाणित भएमा वा सघाएको प्रमाणित भएमा ४० बर्षसम्म जेलसजाय हुनसक्ने कानुनी व्यवस्था रहेको छ । नरसंहारमा पनि सहभागी भएको र सघाएको प्रमाणित भए १० बर्ष जेलसजाय हुनसक्ने प्रावधान छ ।