बेरोजरगारलाई साप्ताहिक ६ सय दिने अवधि नथपी काममा फर्कनेलाई बोनस दिने प्रस्ताव
प्रकाशित मिति : जेष्ठ २०, २०७७ मंगलबार
अमेरिकामा कोरोनाको महामारीका कारण काम गुमाएकाहरुलाई बेरोजगारी विमा वा महामारी बेरोजगारी सहायताका अतिरिक्त दिदै आएको साप्ताहिक ६ सय डलरको अवधि नथपिने सम्भावना बढेको छ । जुलाई ३१ सम्मका लागि बेरोजगारी विमा वा महामारी बेरोजगारी सहायता पाइरहेकाहरुले अतिरिक्त साप्ताहिक ६ सय पनि पाउनेछन् ।
त्यसपछि भने अवधि नथपिने सम्भावना रहेको छ । यद्यपी साप्ताहिक ६ सय दिने सहायता यो सन् २०२१ को जनवरीसम्म थप्ने प्रस्तावसहित डेमोक्र्याट्सहरुले ल्याएको बिल संसदको तल्लो सदनबाट पारित भइसकेको छ । सिनेटबाट पारित हुने सम्भावना भने निकै न्यून रहेको छ ।
दुबै पार्टीका सांसदहरुले अहिले काममा फर्कनेहरुलाई बोनस दिनेगरी बिल ल्याउने विषयमा छलफल गरिरहेका छन् । बेरोजगारी विमा रकम प्राप्त गर्नका लागि काममा नजानेहरुको संख्यालाई मध्यनजर गर्दै काममा फर्कर्नका लागि प्रोत्साहित गर्न बोनस दिनेबारे छलफल भइरहेको छ ।
ओहायोका रिपब्लिकन सिनेटर रोब पोर्टम्यानले काममा फर्कनेहरुलाई साप्ताहिक ४५० डलर बोनस दिने प्रस्ताव ल्याएका छन् । त्यस्तै एकमुष्ठ रकम दिने विषयमा पनि छलफल भइरहेको छ । उदाहरणका लागि १० हप्ताका लागि साप्ताहिक ६ सय दिनुको साटो एकमुष्ठ ६ हजार दिने विषयमा समेत छलफल भइरहेको छ ।