अमेरिकामा ४० लाखलाई डेबिट कार्डमार्फत १२ सय डलरको राहत, यसरी प्रयोग गर्नुहोस्
प्रकाशित मिति : जेष्ठ १५, २०७७ बिहीबार
अमेरिकी सरकारले कोरोनाको महामारीबाट उत्पन्न आर्थिक संकटको सामना गर्न अधिकांश करदाता र कर तिर्न नपर्ने कैयनलाई १२ सय डलरको राहत डेबिट कार्डमार्फत पठाउने भएको छ । ४० लाखलाई डेबिट कार्डमार्फत राहत पठाइदै गरेको आईआरएसले जनाएको छ ।
राहत रकम सबैभन्दा छिटो डाइरेक्ट डिपोजिट बैंक खाता हुनेहरुले प्राप्त गरेका थिए । त्यसपछि कैयनलाई हुलाकमार्फत चेकबाट रकम पठाइएको थियो । अहिले डेबिट कार्डमार्फत समेत रकम पठाउन थालिएको छ । बैंक खाता नहुनेहरुले पनि डेबिट कार्डमा आएको रकम सहजै प्रयोग गर्न सक्ने भएका छन् ।
यो कार्डको प्रयोग अधिकांश प्रयोजनका लागि निशुल्क गर्न सकिनेछ । नेटवर्कको एटीएमबाट रकम निकाल्दा कुनै शुल्क लाग्नेछैन तर नेटवर्क बाहिरको एटीएमबाट रकम निकाल्दा भने २ डलर तिनुपर्नेछ । बैंकको काउन्टरमा गएर टेलरमार्फत रकम निकाल्नुपरेमा भने ५ डलर शुल्क लाग्नेछ ।
नेटवर्क बाहिरको एटीएमबाट ब्यालेन्स चेक गर्दा २५ सेन्टस लाग्नेछ भने अमेरिकाबाहिरको एटीएमबाट रकम निकाल्दा ३ डलर शुल्क लाग्नेछ । यदि कार्ड हराएमा वा चोरी भएमा साढे ७ डलर शुल्क तिरेर नयाँ कार्ड मगाउन सकिनेछ । यदि कार्ड एकसाताभित्र चाहिएमा अतिरिक्त १७ डलर तिर्नुपर्नेछ ।
कार्डबारे कुनै समस्या भएमा फोन नम्बर मा सम्पर्क गर्न सकिनेछ । कार्डमा ४ अंकको पिन सेटअप गर्नुपर्छ । उक्त पिन नम्बर हालेर सामान किन्न वा एटीएमबाट रकम निकाल्न सकिन्छ । कार्डबारे थप जानकारीका लागि वेवसाइटको समेत सुरुवात गरिएको छ ।
यो वेवसाइटमा गएर थप जानकारी लिन सकिनेछ ।
यो १२ सय डलर पाउनका लागि व्यक्तिका हकमा ७५ हजारभन्दा कम आम्दानी, घरमुलीका हकमा १ लाख १२ हजार ५ सय भन्दा कम आम्दानी, दम्पत्तिका हकमा १ लाख ५० हजारभन्दा कम आम्दानी भएको र अमेरिकामा काम गर्न योग्य सोसल सेक्युरिटी नम्बर भएको हुनुपर्छ ।
यदि एकजना करदाताको आम्दानी ७५ हजारभन्दामाथि र ९९ हजारभन्दा कम छ भने आम्दानीको आधारमा प्राप्त गर्ने रकम कम हुँदै जान्छ । यदि घरमुलीको आम्दानी १ लाख १२ हजार ५ सय हजारभन्दामाथि र १ लाख ३६ हजार ५ सयभन्दा कम छ भने आम्दानीको आधारमा प्राप्त गर्ने रकम कम हुँदै जान्छ । त्यस्तै दम्पत्तिको आम्दानी १ लाख ५० हजारभन्दामाथि र १ लाख ९८ हजारभन्दा कम छ भने आम्दानीको आधारमा प्राप्त गर्ने रकम कम हुँदै जान्छ ।
रिटायर्टभएका योग्यहरु, सोसल सेक्युरिटी पाइरहेकाहरु, रेलरोड रिटायर्डहरु, अपांगता वा बरिष्ठको भत्ता लिइरहेकाहरुले ट्याक्स फाइलका लागि प्रयाप्त आम्दानी नगरेपनि यो १२ सय डलरको चेक पाउँछन् ।
बच्चा हुनेहरुले प्रतिबच्चा अतिरिक्त ५ सय डलर पाउँछन् ।