अमेरिका निवासी पत्रकार प्रदीप परियार थापालाई मातृशोक, लकडाउनले भेट्न पाएनन् आमा
प्रकाशित मिति : बैशाख २९, २०७७ सोमबार
अमेरिका निवासी पत्रकार प्रदीप परियार थापालाई मातृशोक परेको छ । गुल्मीमा रहनुभएकी ८७ बर्षीय आमा तिली थापा मगरको आज घरमै निधन भएको पारिवारिक श्रोतले जानकारी दिएको छ ।
हालैमात्र नेपाल गएर आमासँग आफ्नौ जन्मदिन मनाएका प्रदीप थापा कोरोनाको महामारीका कारण भएको लकडाउनले बिरामी आमालाई भेट्न जान पाएका थिएनन् । उनले केही दिन अगाडि आमाको स्वास्थ्यमा क्रमिक सुधार आएको बताएका थिए ।
बिरामी भएको झण्डै एकमहिनापछि आमाको निधन भएको हो । पन्ध्रौं दिनमा फेसटाईममा राम्ररी बोल्दै आमाले सबैलाई आशिर्वाद दिनुभएको प्रदीपले सामाजिक सञ्जालमा लेखेका थिए ।
‘आमाले सन् २०१५ मा नेपाल जाँदा चौरासी कटेसी म मर्दिन, अजम्बरी हुन्छु भन्नुभएको भन्दै प्रदीपले लेखेका थिए आमा अहिले ८७ लागिन्, खानै नखाई यतिका दिन बाँचेर फेरी जिउने सुर कसिन्। धन्य हुन् हाम्री आमा। जुग जिउनु छ आमा अझै। खाना खान शुरू गर्नु ल।’ प्रदीपले लेखेका थिए ।
तर त्यसको केहीदिनपछि आमाको निधन भएको छ ।
केहीदिन अगाडि आमाको मुख हेर्ने दिनमा प्रदीपले सामाजिक सञ्जालमा लेखेका थिए – ‘तिमीले एक एक थोपा, एक एक चिम्टी गरी खुवायौ, पिलायौ र मलाई हुर्कायौ र म “ठूलो” मान्छे बनें। जब मेरो नयाँ दाँत आउने भयो तिमीले चपाएको मकै र भटमास हामी चार भाई मध्येका हामी साना दुई भाईले तिम्रो मुखबाट ढुकुरको चल्लाले जसरी को खाई को खाई गरी खाएको मैले काँ बिर्सेकोछु र? तिमीले खुवाए म विष त पिउन कुनै हिचकिचाहट हुने थिएन भने तिम्रो मायालु गाली र पिटाई अहिले कति प्रिय लागेकोछ। तर, आज, आमाको मुख हेर्ने दिन तिमीले खुब रूवायौ, मैले तिमीले खाना खाउ न सम्म आमा भनेर भन्नु पर्यो।’
‘कसरी भन्न सक्यौ “खान सक्दिन”, खाईदेउ न आमा, प्लिज। हामी सबैको लागि खाईदेऊ न आमा। दुई हप्ता नखाई कसरी बाँच्यौ, अब नखाई हुँदैहुन्न। असह्य पीडामा तिमी त छटपटिएकिछौ नै तर हामी पनि त तिम्रै हालतमा छौं। उडी जान पखेटा छैन। म के गरूँ ? आमा, तिमी बिना यो जीवन अधुरो छ। तिम्रो उमेर जिउन मैले अझै ३७ वर्ष छ, भो मलाई त्यो जीवन चाहिएन, बरू मेरो आयू लिएर तिमी अजम्बरी जिउनू आमा ।’ – उनले लेखेका थिए ।
‘उहाँ अत्यन्तै मायालु हुनुहुन्थ्यो । नेपालमा कतिपय बुढाबुढीले आफ्ना छोराछोरीले कथित दलितसँग विवाह गरेको मन पराउँदैनन् । तर उहाँले मलाई कहिले पनि त्यसरी व्यवहार गर्नुभएन ।उहाँलाई गुमाउनुपरेकोमा हामी स्तब्ध भएका छौं । ‘ – डा. विष्णुमाया परियारले आफ्नी सासुलाई सम्झदै भनिन् ।
