भाइरस कसरी उत्पत्ति भयाे ? अनुसन्धानमा डब्लूएचओलाई सघाउन चीन तयार
प्रकाशित मिति : बैशाख २६, २०७७ शुक्रबार
विश्वव्यापी महामारीका रुपमा फैलिएको कोरोना भाइरस (कोभिड–१९) को संक्रमण कसरी सुरु भयो भन्नेबारे हालसम्म कुनै तथ्य पत्ता लाग्न सकेको छैन । यसको उत्पत्ति र मानिसमा संक्रमण कसरी भयो भनेर विश्व स्वास्थ्य संगठन (डब्लूएचओ)ले गर्ने अनुसन्धानमा चीनले सघाउने प्रतिबद्धता व्यक्त गरेको छ ।
चीनले कोरोना भाइरसको उत्पत्तिबारे वैज्ञानिक अनुसन्धान गरिएमा त्यसलाई पूर्णतः साथ र सहयोग गर्ने चिनिया विदेश मन्त्रालयले जनाएको छ । मन्त्रालयकी प्रवक्ता हुआ चुन्यिङले भाइरसको उत्पत्तिबारे गरिने स्वतन्त्र अनुसन्धानलाई चीनले सहयोग गर्ने बताइन् ।
डब्लूएचओकी संक्रामक रोग विशेषज्ञ डा मारिया भान केर्खोवले बुधबार कोरोना भाइरस संक्रमण मानिसमा कसरी सुरु भयो, कुन जनावरबाट आयो भन्नेबारे अनुसन्धान गर्न चीनसँग कुरा भइरहेको बताएकी थिइन् । यसको प्रतिक्रियास्वरुप बिहीबार बेइजिङमा एक पत्रकार सम्मेलनमा चिनियाँ विदेश मन्त्रालयकी प्रवक्ता चुन्यिङले आफूहरु अनुसन्धानमा सघाउन तयार रहेको बताएकी हुन् ।
उनले अमेरिकाले चीनविरुद्ध नियोजित रुपमा गैरजिम्मेवार र झुटो आरोप लगाइरहेको भन्दै भाइरसलाई राजनीतिकरण गर्न नुहने बताइन् । अमेरिकाकाे झुटाे दाबी खण्डन गर्न समेत स्वतन्त्र अनुसन्धान हुन जरूरी रहेकाे र डब्लूएचओले गर्ने अनुसन्धानमा ‘उपयुक्त समय’ मा चीनले सहयोग गर्ने उनको भनाइ छ ।
यसअघि अमेरिकी राष्ट्रपति डोनाल्ड ट्रम्प र विदेशमन्त्री माइक पोम्पेओले कोरोना भाइरस चीनको प्रयोगशालामा तयार भएको हुन सक्ने भन्दै सार्वजनिक अभिव्यक्ति दिएका थिए । तर चीनले यस भनाइमा कुनै सत्यता नरहेको बताइरहेको छ । अमेरिकाकै गुप्तचर अधिकारीहरुले समेत चीनले भाइरस बनाइको भन्नेमा कुनै आधार नरहेको बताउँदै आएका छन् ।
हालसम्म कोरोना भाइरस चमेरोबाट कुनै समुद्री जीव हुँदै मानिसमा फैलिएको विश्वास गरिँदै आएको छ । तर यसको स्वतन्त्र र वैज्ञानिक पुष्टि हुन सकेको छ्रैन । गत वर्षको डिसेम्बर अन्त्यतिर चीनको वुहानबाट सुरु भएको कोरोना भाइरस महामारी अहिले विश्वभर फैलिएको छ भने २ लाख ७० हजारभन्दा बढी मानिसको मृत्यु भइसकेको छ । एजेन्सी