विश्वभर ९० हजार स्वास्थ्यकर्मी कोरोना भाइरसबाट संक्रमित
प्रकाशित मिति : बैशाख २५, २०७७ बिहीबार
इन्टरनेशनल काउन्सिल अफ नर्सेजका अनुसार विश्वभर हालसम्म ९० हजार स्वास्थ्यकर्मी कोरोना भाइरसबाट संक्रमित भएका छन् । यीमध्ये दुई सय ६० भन्दा धेरै नर्सको मृत्यु भएको छ । यस काउन्सिलले अप्रिलसम्म एक सय नर्सको भाइरस संक्रमणबाट ज्यान गएको जनाएको थियो । आइसिएनका प्रमुख कार्यकारी अधिकृत हवार्ड कटनले भने ‘संक्रमित स्वास्थ्यकर्मीहरुको संख्या २३ हजारबाट बढेर ९० हजारमा पुगेको छ, मलाई लाग्छ यो संख्या ९० हजारभन्दा पनि बढी छ ।’
काउन्सिलले कतिपय देशबाट स्वास्थ्यकर्मीको अवस्था बारे ठोस जानकारी नआएकाले संक्रमित स्वास्थ्यकर्मीको संख्या अझ बढी हुन सक्ने अनुमान गरेको छ । विश्वका विभिन्न देशमा महामारीविरुद्धको लडाइमा अग्रपंक्तिमा रहेर खटिएका स्वास्थ्यकर्मी पर्सल प्रोटेक्टिभ इक्युप्मेन्ट पिपिईको कमीका कारण पनि धेरै संक्रमितभ भएको बताइएको छ ।
इरानमा फेरि बढ्यो कोरोना संक्रमण
इरानमा घट्दै गएको कोरोना संक्रमण पछिल्लो चार दिनदेखि बढ्दै गएको छ । बुधबार एक हजार छ सय ८० नयाँ संक्रमित भेटिएको पुष्टि भएको छ । यो ११ अप्रिलपछि यता देखिएको सबैभन्दा उच्च संख्या हो । इरानमा कुल संक्रमितको संख्या एक लाख नाघिसकेको छ ।
भाइरसको संक्रमणमा कमी आएपछि ११ अप्रिलदेखि लकडाउन केही खुकुलो गरिएको थियो । कम जोखिमयुक्त क्षेत्रका मस्जिदहरु खोल्न अनुमति दिइएको थियो । मध्यपूर्वमा सबैभन्दा बढी प्रभावित देश इरान हो । हालसम्म त्यहाँ छ हजार चार सय १८ को मृत्यु भएको छ ।विश्वभर ३८ लाख २० हजार मानिस भाइरसबाट संक्रमित भएका छन् भने दुई लाख ६५ हजारको मृत्यु भएको छ ।