भारतमा रासायनिक प्लान्टमा ग्यास लिक हुँदा ८ जनाको मृत्यु, कैयौँ बिरामी
प्रकाशित मिति : बैशाख २५, २०७७ बिहीबार
भारतको आन्ध्र प्रदेशको विशाखापटनमस्थित एक रासायनिक प्लान्टमा ग्यास लिक हुँदा आठ जनाको मृत्यु भएको छ । जिल्ला अधिकारी विनय चाँदका अनुसार दुई सयभन्दा बढी मानिस बिरामी भएका छन् । उक्त प्लान्टमा बिहीबार बिहान ३ बजे स्टाइरिन ग्यास लिक भएको थियो । बिरामी परेका सबैलाई अस्पताल लगिएको छ भने ८६ जनालाई भेन्टिलेटरमा राखेर उपचार गरिँदैछ ।
विजागका प्रहरी प्रमुख आरके मिनाले तीन जनाको प्लान्टनजिकै र अन्य पाँच जनाको जर्ज अस्पतालमा उपचारको क्रममा मृत्यु भएको बताएको बिबिसीले जनाएको छ ।
प्रहरीले प्लान्ट आसपासका पाँच गाउँ खाली गराएर त्यहाँका बासिन्दालाई सुरक्षित स्थानतर्फ सारेको छ । कतिपयले आँखा पोलेको र सास फेर्न गाह्रो भएको बताएका छन् । विशेषगरी ज्येष्ठ नागरिक र बालबालिकाले श्वासप्रश्वासमा समस्या भएको बताएका छन् ।
भारतमा भएको लकडाउन केही खुकुलो बनाएपछि प्लान्टमा काम सुरु भएको थियो । जिल्ला अधिकारी चाँदका अनुसार ग्यास चुहावट रोक्ने प्रारम्भिक प्रयासमा अहिलेसम्म कुनै सफलता हासिल भएको छैन। यो नियन्त्रण गर्न अझ दुई घण्टा लाग्छ । सुरक्षाकर्मी र दमकलले यसलाई नियन्त्रणमा लिने प्रयास गरिरहेका छन् ।
ग्यास तीनदेखि पाँच किलोमिटरसम्म फैलिने अनुमान गरिएको छ । ग्यास कसरी लिक भएको भन्ने अहिलेसम्म पत्ता लागेको छैन । प्लान्टको व्यवस्थापनविरुद्ध मुद्दा दर्ता समेत भएको छ ।
यो रासायनिक प्लान्ट एलजी पोलिमर्स इन्डिया प्राइभेट लिमिटेडको हो। सन् १९६१ मा निर्माण गरिएको यो प्लान्ट हिन्दुस्तान पोलीमरको थियो, पछि सन् १९९७ मा दक्षिण कोरियाली कम्पनी एलजीले अधिग्रहण गर्यो ।