चीनले झण्डै एकतिहाई मृत्यु लुकाएको खुलासा, आज थप १२९० मृत्यु सार्वजनिक
प्रकाशित मिति : बैशाख ५, २०७७ शुक्रबार
अन्तत चीनका अधिकारीहरुले वुहानमा मृत्यु भएका थप १२९० जनाबारे सार्वजनिक गरेका छन् । चीनमा कोरोनाभाइससका कारण मृत्यु भएकामध्ये यी झण्डै एकतिहाईको मृत्यु सार्वजनिक गरिएको थिएन ।
अप्रिल १७ सम्म चीनमा ३३४२ जनाको मात्र मृत्यु भएको रिपोर्ट सार्वजनिक गरिएको थियो । शुक्रबारमात्रै मृतकको संख्या १२९० थपेपछि अब चीनमा मृतकको संख्या ४६३२ पुगेको छ । पहिले वुहानमा २५७९ को मृत्यु भएको चीनले रिपोर्ट गरेको थियो ।अब वुहानमामात्र मृतकको संख्या ३८६९ पुगेको छ ।
अधिकारीहरुले यी मृत्युहरु सुरुमा गणना नगर्नुको कारण उनीहरु घरमै मरेको बताएका छन् । स्वास्थ्यकर्मीहरु मृतकको संख्या गणना गर्नुभन्दा पनि उपचारमा नै केन्द्रीत भएकाले यस्तो भएको उनीहरुले दावी गरेका छन् ।
चीनका अधिकारीहरुले कोरोनाको महामारी सम्बन्धि तथ्यांक परिवर्तन गरेको यो पहिलोपटक होइन । जनवरी र फरबरीमा पनि उनीहरुले तीनपटक गणना परिवर्तन गरेका थिए ।
यसैबीच अमेरिकाको खुफिया अधिकारीहरुले कोरोना भाइरस बजारबाट नभई चीनको ल्याबबाट फैलिएको हुनसक्नेबारे अनुसन्धान सुरु गरेका छन् । यद्यपी यसबारे कुनै निष्कर्ष भने निकालिएको छैन ।
अमेरिकाले यो भाइरस बायो हतियार भएको कुरामा विश्वास गर्दैन तर अमेरिकाको खुफियाले कोरोनाभाइरस चीनको ल्याबमा उत्पादन गरिएको र दुर्घटनावश बाहिर आएको भन्ने सिद्धान्तबारे अनुसन्धान गरिरहेको छ ।
अमेरिकाले चीनको ल्याबमा दुर्घटनावश कोही व्यक्ति संक्रमित भएका कारण वा कमजोर ह्याण्डलिङका कारण कोरोना भाइरस फैलिएको हुनसक्ने सिद्धान्तको तथ्य जाँच गर्न सुरु गरेको छ ।